1 Ale leage geargat sárdnut alege daja maidege jurdilkeahttá Ipmila muođuid ovddas, dasgo Ipmil lea almmis ja don leat eatnama alde. Lehkoset du sánit dan dihte hárvát.
2 Ollu váivvis bohtet niegut,
eatnat sániin jallas ságat.
3 Go don dagat Ipmilii lohpádusa, de ale ájahala ollašuhttimis dan, dasgo son ii liiko dovkkiide. Ollašuhte dan maid lohpidat! 4 Buoret lea orrut lohpitkeahttá go lohpidit ja guođđit lohpádusa deavddekeahttá. 5 Ale divtte njálmmi doalvut iežat suddui, ale daja Ipmila áirasii: “Mun dahken dan vahágis.” Ale divtte sániidat moaráhuhttit Ipmila, nu ahte son billista dan maid don leat dahkan. 6 Buot nieguin, buot duššálašvuođas, buot sániin: Bala Ipmilis!
7 Jos oainnát ahte iežat eananguovllus váivváš sordojuvvo ja riekti ja vuoigatvuohta rihkkojuvvo, de ale ovddoš dan: Nubbi gievra goziha nuppi, ja eará gievrrat goappašagaid. 8 Eatnamii lea ávkin ahte das lea gonagas, dalle eanan gilvojuvvo.
Riggodat lea duššálaš
9 Dat gii ráhkista ruđa, ii goassege gallán ruđain, iige dat gii ráhkista riggodaga, goassege oaččo dan doarvái. Datnai lea duššálašvuohta. 10 Mađi stuorit opmodat, dađi eambbo borrit. Mii ávkkiid das lea eaiggádii earret dan ahte su čalmmit dan oidnet? 11 Bargi nagir lea njálggat, juogo son boraš uhccán dahje eatnat, muhto riggá vallji ii bállet su oađđit.
12 Mun lean oaidnán bahás ja váivves ášši beaivváža vuolde: Duhččojuvvon riggodat šaddá lihkuhisvuohtan eaiggádasas. 13 Su lossa rahčamis fuolakeahttá su riggodat nogai, ja vaikko sus lei bárdni, de bártni gihtii ii báhcán mihkkege. 14 Nu go son bođii eatnis goaŧus, nu son manai fastain eret, seammá álásin go bođii, iige son sáhttán váldit mielddis maidege das maid lei háhkan rahčamušainis. 15 Dat lea bahás ja váivves gillámuš: Aiddo nu mo son lei boahtán, nu son fertii mannat eret. Mii ávkkiid sutnje lei das ahte son lei rahčan ja váinnuhan biekka? 16 Buot su beaivvit leat seavdnjadas ja moraš, dorvvuhisvuohta, buohcuvuohta ja bahčavuohta.
17 Dán mun lean gávnnahan: Olbmui lea buorre ja heivvolaš borrat ja juhkat ja leat ilus buot rahčamušaid siste maiguin son váivvida iežas beaivváža vuolde buot vátna eallinbeivviidis maid Ipmil lea addán sutnje; dat lea olbmo oassi. 18 Go Ipmil addá olbmui riggodaga ja opmodaga ja diktá su návddašit dan, váldit das iežas oasi ja leat ilus rahčamušaidis gaskkas, de dat lea Ipmila attáldat. 19 Dalle olmmoš ii jurddaš nu ollu dan mo su eallinbeaivvit vásset, dasgo sutnje lea galle dat illu maid Ipmil addá.