Egyptesne svaatjkoen nuelesne
1 Jisraelen elkieh Jaahkine jïh jïjtsinie fuelhkine Egyptese böötin. Dej nommh lin: 2 Ruben, Simon, Levi jïh Juda, 3 Jissakar, Sebulon jïh Benjamin, 4 Dan jïh Naftali, Gad jïh Asjer. 5 Tjïjhtjeluhkie almetjh Jaahken boelveste. Josef joe Egyptesne. 6 Dellie Josef sealadi jïh altese vïellh jïh gaajhkesh gïeh dej beeli jieliejin. 7 Jisraelehkh jeananin jïh vöölle jïjnjh almetjh sjïdtin, jïjnjh almetjh abpe laantesne.
8 Orre gånka Egyptese sjïdti, jïh idtji dïhte daejrieh gie Josef lij. 9 Gånka jïjtse almetjidie jeehti: «Vuartasjidie, dan jïjnjh jisraelehkh jïh dah jienebh mijjeste. 10 Dellie amma tjoerebe vijsieslaakan dejgujmie dåemiedidh, olles jienebh sjïdth. Jis dåaroe sjædta, dellie sih mijjen vuestiehkinie aktanieh jïh mijjine dåaroeh jïh daebpede vuelkieh.»
11 Dellie åvtehkh stillin jisraelehkide barkojne norhtehtidh. Göökte staarh: Pitomem jïh Ramsesem tjoerin faraovese bigkedh. 12 Seamma man tjamki norhtehtin barkedh, læjhkan jisraelehkh jeananin jïh joevenin. Dellie egypteladtjh jisraelehkijste bïllijin. 13 Jisraelehkide norhtehtin barkedh 14 jïh dej biejjieh sååjrehke sjïdtin. Jisraelehkide tjabrehtin laejrine jïh laejrie-gierkine dovne laantine lyövlehke barkedh. Jisraelehkh tjoerin gaajhkem darjodh.
15 Egypten gånka hebreladtji tsegk-ietnide – mubpien nomme Sjifra jïh mubpien nomme Pua – soptsesti: 16 «Gosse hebreladtji nyjsenæjjide viehkiehtidien baersieldidh, dellie galkeden gïehtjedidh. Gosse baernie, dellie galkeden dam buvvedh jïh gosse nïejte, dellie baajeden dam jieledh.» 17 Mohte tsegk-ietnieh Jupmelem golteligan. Idtjigan darjoeh guktie egypteladtji gånka stilleme. Baernide baajigan jieledh. 18 Dellie egypteladtji gånka tsegk-ietnide jïjtse gåajkoe gåhtjoeji jïh jeehti: «Mannasinie numhtie, mannasinie baajeden baernide jieledh?» 19 Tsegk-ietnieh faraovese vaestiedigan: «Hebreladtji nyjsenæjjah eah goh egypteladtji nyjsenæjjah. Dah fååmijesåbpoe. Aerebe goh tsegk-ietnie jakseme båetedh, dah joe baersieldamme.» 20 Jupmele tsegk-ietnide viehkiehti. Jisraelehkh jeananin jïh ålvoes jïjnjh almetjh sjïdtin. 21 Juktie tsegk-ietnieh Jupmelem golteligan, jisraelehkh jïjnjh maanah åadtjoejin.
22 Dellie faraove altese almetjidie stilli: «Fïerhtem baerniem guhte reakede, galkeden Nilen-jeanose bitnehtidh, nïejtide jis baajeden jieledh!»