Damaskusa ja Efraima heavvu
1 Sátni Damaskusa hárrái.
Damaskus ii leat šat gávpot,
dat duššaduvvo ja šaddá čievračopman,
2 agibeaivái hilgojuvvon.
Dan birasgávpogat guđđojuvvojit ealuide,
dat livvot dohko muosis.
3 Efraim manaha ladnis,
Damaskus gonagasvuođas.
Arama bázahassii geavvá
nugo Israela hearvásvuhtii.
Ná cealká Hearrá, Almmiveagaid Ipmil.
4 Dan beaivvi devkkoda
Jakoba hearvásvuohta,
buot su buidodat sotná.
5 Dasa geavvá dego ceaggájeaddji gordnái:
Olmmoš váldá gihtii gihpu
ja čuohppá gordneoivviid.
Dasa geavvá nugo Refaimleagi beldui,
go olbmot leat čoaggán gordneoivviid:
6 Báhcá dušše maŋŋerádjan,
nugo dalle go olmmoš
cápmá oliivvaid vuolás:
Guokte, golbma oliivva
badjin muorragierragis,
njeallje, vihtta ovssiin.
Ná cealká Hearrá, Israela Ipmil.
7 Dan beaivvi olbmot jorgalit sivdnideaddjiset beallái ja gehččet Israela Bassái. 8 Eai sii šat jorgal áltáriid beallái, eai iežaset daguid beallái, eai šat geahča ašeračuolddaide ja suovasáltáriidda maid sii leat dahkan iežaset gieđaiguin.
9 Dan beaivvi du gávpogat šaddet seammá ávdimin go dat gávpogat maid amorlaččat ja hivvelaččat hilgo, go israellaččat bohte. Buot šaddá ávdimin.
10 Don leat vajáldahttán Ipmila
gii du beastá,
itge leat muitán bávtti, iežat dorvobávtti.
Ráhkat fal ain šaddogárddiid
čáppa ipmiliidda
ja gilvve vieris viidnemuoraid!
11 Don gilvvát daid ja oaččut daid
dalán allánit,
don gilvvát ja fidnet daid liđiidit
juo ihttánaga.
Muhto lájut leat báhtaran
go boahtá givssi beaivi,
iige du bákčasii leat geahpádus.
Hearrá biđge Israela vašálaččaid
12 Vuoi ollu álbmogiid mára!
Dat lea dego máraideaddji ábi márra.
Vuoi álbmogiid čearddaid šláma!
Dat šlápmet dego fámolaš čázit šlápmet.
13 Muhto go Hearrá čerge daidda,
de dat báhtarit guhkás.
Dat leat dego sáđut
maid biegga ádjá váriid badjel,
nugo rássediehppi riđus.
14 Eahkedis lea suorganeapmi,
iđedis dat leat jávkan.
Dakkár lea rievideddjiid vuorbi,
dakkár stajideddjiid oassi.