Heelsegh
1 Heelsegh Jaahken luvhtie, gie Jupmelen jïh Åejvie Jeesus Kristusen deanere, luhkiegööktide åålmegidie gïeh ammes dajvese saajenamme.
Gosse jaahkoe gïehtjelåvva
2 Åerpenh, ussjedidie, aavrehke lidie gosse dijjen ovmessie dåeriesmoerh. 3 Juktie daejrede, gosse dijjen jaahkoe gïehtjelåvva, dellie gaarsje båata. 4 Ellies dåemiedimmie gaarsjeste båata, jïh dellie ellies jïh aejvie sjïdtede jïh ij mij edtjh dijjese fååtesidh.
5 Jis gie akt dijjen luvnie ij vijsiesvoetem utnieh, dellie galka Jupmielasse rohkelidh gie gaajhkesidie vyljehke vadta jïh ij kradtjohth. Dellie vijsiesvoetem åådtje. 6 Galka jaahkosne rohkelidh jïh ij galkh geakasjidh. Juktie dïhte gie geakesje, goh mearoen baaroe slomtjedh-bïegkesne lea. 7 Dagkeres almetje ij maehtieh maam gænnah Åejveste vuertedh 8 juktie geakesje jïh iktesth plinhtjestalla.
9 Veassoeh vïelle edtja madtjeldidh gosse bæjjelge 10 jïh ræjhkoes almetje gosse vualene juktie galka haavjodh goh såafoen sjædtoeh. 11 Biejjie jæjhta, kraesie bualna jïh rïesegh skijlieh jïh eah vielie hïerves leah. Ræjhkoes almetje seammalaakan skæjla gosse baaverdeminie.
12 Aavrehke dïhte gie saavrehke gosse gïehtjelåvva. Gosse gïehtjelimmiem gaarsjele, dellie vitneme-vïerem åådtje. Dam Jupmele dåajvoehtamme dejtie gïeh satnem iehtsieh. 13 Ij gie gænnah, gie gïehtjelåvva, edtjh jiehtedh Jupmele dïhte satnem gïehtjele. Ij Jupmele bahhasvoeteste gïehtjelovvh, jïh ij jïjtje gïem gïehtjelh. 14 Dïhte gie gïehtjelåvva, jïjtse njaahtjoemistie vïegkehtåvva jïh gïehtjelåvva. 15 Gosse njaahtjome nåajsan sjïdteme, dellie sådtoem baerselde, jïh gosse sådtoe byjjenamme, dellie jaememem baerselde.
16 Mov gieries åerpenh, aellede beahtahtallh! 17 Gaajhkh buerie vadtesh jïh ellies vadtesh bijjielistie båetieh, elmie-tjoevki aehtjien luvhtie. Altese luvnie ij naan værhtoedimmie jallh tjoevkese mij jamhkoe. 18 Jïjtse mïelen mietie mijjem baersieldamme saetniesvoeten baakojne guktie uvtemes sjïdtebe dejstie giejtie sjugniedamme.
Goltelidh jïh barkedh
19 Mov gieries åerpenh, daam tjoerede daejredh: Fïereguhte galka dallah goltelidh jïh mænngan soptsestidh jïh minngemosth siemieh sigkedh. 20 Juktie almetjen siemieh ij dam darjoeh mij rïektes Jupmielasse. 21 Laehpede dellie gaajhkem mij dielies jïh bahhas, jïh dåastoehtidie lujjieslaakan baakoem mij dijjese seejesovveme jïh maahta dijjen sealojde gorredidh. 22 Darjode dam maam Baakoe stillie jïh aellede Baakoem ajve goltelh juktie dellie jïjtjemdh bïehtedidie! 23 Juktie dïhte gie Baakoem gåvla jïh ij dam darjoeh maam Baakoe stillie, lea goh almetje gie jïjtjemse speejjelisnie vuartesje: 24 vuartesje, vualka jïh dallah åajaldahta guktie guelmie lea. 25 Almetje gie frïjjevoeten ellies laakese vuartesjeminie jïh ij åajaldehtieh maam govleme, dïhte aavrehke sjædta gosse dam dorje maam govleme.
26 Dïhte gie ussjede satne Jupmelem heevehte, jïh ij maehtieh njoektjemem deemedh, jïjtjemse bïehtede, jïh jïjtse jupmele-heevehtimmie aavenaaktje. 27 Aarpijidie jïh eejhtegabpts maanide neavroste viehkiehtidh jïh ij veartenen solkeldahkesne årroeh, dïhte raajne jïh ellies Jupmielasse, mijjen Aahtjan.