Hopp rett til
Kirkeårets teksterDagens bibelord
Tegnforklaringer
Bibelleseplaner
Kjøp Bibelen
Bibelsøk
Søk
 |
 |
 |
| Hvor finner jeg... |
.
Jeremia
1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 50 51 52| < Forrige kapittel | Neste kapittel > |
Stuorra goikkádat 14Hearrá sátni mii bođii Jeremiai goikkádaga dihte: 2 Juda morašta, gávpogat goarránit, poarttat njagagit morrašis eatnamii, váidalusčuorvasat badjánit Jerusalemis. 3 Gávpoga stuorrát vuolggahit bálvváideaset viežžat čázi, muhto go dat bohtet gáldogurrii, de ii leat čáhci. Sii nuonddahallet, máhccet guoros lihtiiguin ja gokčet muođuid heahpanemiin. 4 Bealddut luoddanaddet go eatnamii ii boađe arvi, bealdobargit heahpanit ja gokčet oaivviset. 5 Velá goddeáldu meahcis guođđá easkka šaddan miesis, danne go ii leat mihkkege ruotnasiid. 6 Báljes dieváin čužžot meahciásenat ja hahpaštuddet nugo šakálat, dat gehččet dieigan čalmmiiguin, rássi ii leat. 7 Vaikko min vearredagut duođaštitge min vuostá, de veahket, Hearrá, namat dihte! Eatnat gerddiid mii leat jorralan, du vuostá mii leat suddudan. 8 Hearrá, don guhte leat Israela doaivu ja beasti heađi áiggi, manne don leat dego vieris olmmoš eatnamis, nugo mátkkálaš gii orusta dušše ovtta idjii? 9 Manne don leat dego dárpmehis olmmái, nugo soahteolmmái gii ii sáhte veahkehit? Ja almmatge don leat min gaskkas, du namma lea celkojuvvon min badjel. Hearrá, ale guođe min! 10 Ná cealká Hearrá dán álbmoga birra: Sii liikojit jođašit, julggiideaset sii eai seastte. Muhto mun, Hearrá, in šat gierdda dan. Mun muittán sin vearredaguid ja ráŋggáštan sin suttuid. 11 Hearrá celkkii munnje: Ale rohkadala dán álbmoga ovddas. 12 Vaikko sii fástudit, de mun in gula sin čuorvuma; go sii oaffaruššet boaldinoaffariid ja borramušoaffariid, de mun in beroš sis. Mun loavttán sin mihkiin, nelggiin ja rohttudávddain. 13 De mun dadjen: Muhto Hearrá, mu Ipmil, profehtathan dadjet sidjiide: “Dii ehpet oainne miehki ehpetge gillá nealggi, danin go Hearrá addá didjiide bissovaš ráfi dán eatnamis.” 14 Hearrá celkkii munnje: Profehtat leat profehtastallan giellásiid mu nammii. In mun leat vuolggahan sin, in leat gohččon sin inge sárdnon sidjiide. Gielis oainnáhusaid, guoros einnostusaid ja iežaset behtolaš govahallamiid sii profehtastallet didjiide. 15 Dan dihte cealkkán mun, Hearrá, daid profehtaid birra geat profehtastallet mu namas vaikko mun in leat vuolggahan sin, ja geat dadjet ahte miehkki ja nealgi ii boađe dán eatnamii. Duot profehtat duššet miehkkái ja nealgái. 16 Ja seammá ládje geavvá dán álbmogii masa sii einnostit: Jerusalema gáhtat divvet dain geat leat jápmán miehkkái ja nealgái. Ii oktage leat hávdádeamen sin ja sin áhkáid, bártniid ja nieiddaid. Mun golggahan sin bahávuođa sin iežaset badjelii. 17 Sártno sidjiide dáid sániid: Gatnjalat golget mu čalmmiin ijatbeaivái eaige bisán. Nieida, mu iežan álbmot, lea deaivvahallan garra časkkástahkii, lea ožžon buoritmeahttun hávi. 18 Jos mun vuolggán gávpogis, de mun oainnán daid geaid miehkki lea goddán, ja jos boađán gávpogii, de mun oainnán daid geat leat roahppánan nealgái. Velá profehtat ja báhpatge čádjádallet eatnamis eaige dieđe maid dahkat. 19 Leatgo don, Hearrá, áibbas hilgon Juda, fasttášatgo don Siona? Manne leat časkán min, nu ahte mii eat šat buorrán? Mii sávaimet ráfi, muhto ii boahtán mihkkege buriid, mii vurddiimet dálkkasteami, muhto bođii suorganeapmi. 20 Hearrá, mii dovdat iežamet bahávuođa, mii diehtit áhčiideamet rihkkosiid. Mii leat suddudan du vuostá. 21 Namat dihte, ale hilggo min, ale suova hearvásvuođat truvnnu šaddat heahppášuhttojuvvot! Muitte lihtot maid dahket minguin, ale rihko dan! 22 Vedjetgo álbmogiid guttahis ipmilat addit arvvi? Dahkágo albmi ieš arveovttiid? Itgo dušše don, Hearrá, min Ipmil? Du mii vuordit, dasgo don leat sivdnidan buot dáid. |
| < Forrige kapittel | Neste kapittel > |
Lukk X
Her kan registrerte brukere snart lagre egne kommentarer på det valgte verset.
Nå lager vi ny nettbibel
Nettbibelen blir ny høsten 2023. Vi ruller ut nye funksjoner fortløpende, og trenger din hjelp til å teste og gi tilbakemelding.
Test på beta.bibel.no