Jeremia

Babylona gonagasa geasis

¹ Juda gonagasa Sidkia, Jošia bártni, ráđđenáiggi álggus Jeremiai bođii dát Hearrá sátni: ² Hearrá celkkii munnje ná: Ráhkat alccesat čanastagaid ja geassáid ja bija geassá niskásat. ³ Vuolggat geassáid dasto Edoma, Moaba, Ammona, Tyrosa ja Sidona gonagasaide daid áirasiid fárus geat leat boahtán Juda gonagasa Sidkia lusa Jerusalemii. ⁴ Gohčo sin sárdnut hearráidasaset dáid mu sániid: Ná cealká Hearrá, Almmiveagaid Ipmil, Israela Ipmil: ⁵ Stuorra fámuinan ja geigejuvvon gieđainan mun lean sivdnidan eatnama ja olbmuid ja elliid mat leat eatnama alde, ja mun attán daid geasa dáhtun. ⁶ Dál mun attán din eatnamiid bálvaleaddjásan Nebukadnesarii, Babylona gonagassii. Velá meahci spiriidge mun bijan bálvalit su. ⁷ Buot álbmogat galget bálvalit su, su bártni ja su bártnibártni, dassážii go su eatnamii lea boahtán áigi šaddat eará álbmogiid ja stuorra gonagasaid bálvaleaddjin. ⁸ Jos muhtun álbmot dahje riika ii dáhto bálvalit Babylona gonagasa Nebukadnesara iige sodjalahttit niskki su geassá vuollái, de mun ráŋggáštan dan mihkiin, nelggiin ja rohttudávddain. Mun vuolggahan Babylona gonagasa soahtat dainna álbmogiin, dassážii go lean duššadan daid, cealká Hearrá. ⁹ Allet guldal iežadet profehtaid, einnosteddjiid, niegadeddjiid, mearkačilgejeddjiid alletge noiddiid geat dadjet: “Ehpet dii šatta bálvalit Babylona gonagasa.” ¹⁰ Sii profehtastallet giellásiid, vai dii šaddabehtet guhkás iežadet eatnamis. Mun áján din eret, ja dii duššabehtet. ¹¹ Muhto dan álbmoga mii sodjalahttá niskki Babylona gonagasa geassá vuollái ja bálvala su, mun divttán ássat iežas eatnamis. Doppe dat oažžu ássat ja bargat eatnama, cealká Hearrá.

¹² Juda gonagassii Sidkiai mun sárdnon aivve seammá sániid: Sodjalahttet niskki Babylona gonagasa geassá vuollái ja bálvalehket su ja su álbmoga, de dii oažžubehtet eallit. ¹³ Manne don ja du álbmot jámášeiddet miehkkái, nealgái ja rohttudávdii? Dákkár loahpain Hearrá lea áitán ráŋggáštit dan álbmoga mii ii dáhto bálvalit Babylona gonagasa. ¹⁴ Allet guldal profehtaid geat dadjet: “Ehpet dii šatta bálvalit Babylona gonagasa.” Sii profehtastallet giellásiid! ¹⁵ Hearrá cealká: Mun in leat vuolggahan sin. Sii gielistit go sárdnot mu nammii. Jos dii jáhkkibehtet sidjiide, de mun áján din eret ja divttán din duššat oktan daiguin profehtaiguin geat profehtastalle didjiide.

¹⁶ Báhpaide ja oppa dán álbmogii mun sárdnon: Ná cealká Hearrá: Allet guldal profehtaid geat profehtastallet didjiide ja lohket: “Hearrá tempela bassi lihtit buktojuvvojit fargga ruoktot Babylonis.” Sii profehtastallet giellásiid! ¹⁷ Allet guldal sin, muhto bálvalehket Babylona gonagasa, de oažžubehtet eallit. Manne dát gávpot galggašii šaddat čievračopman? ¹⁸ Muhto jos sii duođaid livčče profehtat geat leat ožžon sáni Hearrás, de sii rohkadalašedje Hearrá, Almmiveagaid Ipmila, vai dat lihtit mat ain leat Hearrá tempelis ja Juda gonagasa šloahtas ja Jerusalemis, eai gárttaše Babylonii. ¹⁹ Ná cealká Hearrá, Almmiveagaid Ipmil: Dán gávpogiihan leat vel báhcán tempela báccit, bronsamearra, beavddit ja eará biergasat. ²⁰ Daid Babylona gonagas Nebukadnesar ii váldán fárrui go son doalvvui Juda gonagasa Jekonja, Jojakima bártni, fáŋgan Jerusalemis Babylonii, oktan buot Juda ja Jerusalema stuorráiguin. ²¹ Ná cealká Hearrá, Almmiveagaid Ipmil, daid biergasiid birra mat ain leat Hearrá tempelis, Juda gonagasa šloahtas ja Jerusalemis: ²² Dat dolvojuvvojit Babylonii! Doppe dat leat gitta dan beaivvi rádjái go mun áimmahušan daid, cealká Hearrá. Dalle mun vieččan daid ja buvttán daid fas dán báikái.