Moab duššaduvvo
1 Moabii.
Ná cealká Hearrá, Almmiveagaid Ipmil,
Israela Ipmil:
Vuoi Nebo, dat lea duššaduvvon!
Kirjataim lea váldojuvvon,
dan ladni vuollánan ja cuvkejuvvon.
2 Moaba gudni ii leat šat.
Hešbonis smihttet bahás áigumušaid:
“Bohtet, ruohtastuhttot Moaba,
dat ii oaččo šat leat álbmot!”
Maiddái don, Madmen, jávohuvat,
miehkki lea doarrideamen du.
3 Gullet bárguma Horonajimis,
roahpi ja garra roasu.
4 Moab lea duššaduvvon,
dan uhcahaččat bárgot.
5 Olbmot mannet čieru
Luhita gorgŋehaga,
Horonajima njiejaldagas
gullo heahtebárgun roasu dihte.
6 “Báhtarehket, gádjot heakkadet!”
Muhto dii lehpet dego miestta meahcis.
7 Don, Moab, leat dorvvastan
iežat daguide ja dávviriidda,
danin donge váldojuvvot.
Kemoš manná fáŋgavuhtii oktan
báhpaidisguin ja oaivámuččaidisguin.
8 Vašálaš boahtá ja duššada gávpogiid,
ii oktage gáddjo.
Leahki duššaduvvo,
badjosat stajiduvvojit.
Ná Hearrá lea cealkán.
9 Ceggejehket hávdegeađggi Moabii,
dan loahppa lea boahtán.
Dan gávpogat báhcet ávdimin,
iige oktage ása dain.
10 Garuhuvvon lehkos juohkehaš
gii navgasit doaimmaha Hearrá dagu!
Garuhuvvon lehkos dat
gii ii golggat vara mihkiinis!
11 Moab lea eallán oadjebassan
gitta nuorravuođa rájes,
dat lea leamaš muosis nugo viidni loagis alde
iige leat dolvojuvvon fáŋgavuhtii.
Dat ii leat njorrojuvvon lihtis lihttái,
dan dihte dan smáhkka lea nugo ovdal,
dan hádja ii leat rievdan.
12 Muhto beaivvit bohtet, cealká Hearrá, go mun vuolggahan Moabii viidnegolggaheddjiid. Sii golggahit viinni ruhkuin, gurrejit daid ja časket daid moallun. 13 Moab beahtahallá Kemošii, nugo Israel beahtahalai Betela ipmilii, vaikko álbmot dorvvastiige dasa.
14 Mo dii sáhttibehtet dadjat:
“Mii leat sáŋgárat
ja searalaš soahteolbmát”?
15 Moab duššaduvvo,
dan gávpogat váldojuvvojit,
dan vállju nuorra olbmát gottáhallet.
Ná cealká Gonagas –
Hearrá, Almmiveagaid Ipmil,
lea su namma.
16 Moab duššá fargga,
dan oasehisvuohta gáhččá sakka.
17 Árpmoštallet su, buot ránnját,
čirrot dii buohkat
geat dovdabehtet su nama.
Dadjet: “Doddjon lea nana soabbi,
hearvás ráđđensoabbi!”
18 Dii geat ássabehtet Dibonis,
njidjet gudnesajisteattet
ja čohkánehket duvdnái!
Moaba vašálaččat fallehit dál din
ja duššadit din ladnemuvrraid.
19 Čuoččastehket geaidnogurrii várdát,
dii Aroera ássit!
Jerret báhtareddjiin, olbmáin ja nissoniin,
jerret mii lea dáhpáhuvvan.
20 “Moab lea vuollánan ja časkojuvvon,
dat lea gahččan.
Luibmet ja bárgot!
Gulahehket Arnongáttiin:
Moab lea duššaduvvon!”
21 Duopmu lea deaividan badjosiid gávpogiid: Holona, Jahasa ja Mefaata, 22 Dibona, Nebo ja Bet-Diblatajima, 23 Kirjatajima, Bet-Gamula ja Bet-Meona, 24 Kerijota, Bosra ja buot eará Moaba gávpogiid sihke guhkkin ja lahka.
25 Moaba čoarvi lea eret čuolastuvvon,
su giehta lea doddjojuvvon,
cealká Hearrá.
26 Jugahehket Moaba gárremiidda, vai dat snuitte iežas vuovssanassii ja šaddá ieš bogostahkan. Dat lea goarggastallan Hearrá vuostá! 27 Dat lea atnán Israela bilkun, nugo bilkiduvvojit suollagat geat gávnnahallet. Álo go Israel lea leamaš sáhkan, de sii leat bárdán oaivvi bilkidemiin.
28 Vulget gávpogiin, moablaččat,
ásset báktehoaluide!
Dahket dego duvvát
mat bessejit bákteráhkamiidda!
29 Mii leat gullan Moaba goarratvuođa,
man gáddálaš dat lea leamaš,
man čeavlái, rábmái
ja gorgesváimmot.
30 Mun dovddan moablaččaid goargatvuođa, cealká Hearrá. Sin dagut čájehit sin sániid guorusvuođa. 31 Mun luoimman Moaba vuorbbi, bárggun oppa álbmoga dihte, šuohkán go muittán Kir-Heresa ássiid.
32 Mun čierun eanet du
go Jasera, don Sibma viidnemuorra.
Du oavssit faŋuhedje meara rastá,
olle gitta Jasera rádjái.
Gaskan rádjama fallehii duššadeaddji,
doalvvui du šaddosiid ja viidnemurjjiid.
33 Illu ja ávvu lea váiduduvvon
Moaba šaddogárddiin.
Viidnebohčingárit eai šat dieva,
ii oktage duolmma šat viidnemurjjiid.
Rádjančuorvasat leat jávohuvvan.
34 Hešbon ja Elale luibmet, daid bárgun gullo gitta Jahasa rádjái, Soaris gitta Horonajima ja Eglat-Šelišia rádjái. Velá Nimrima čázitge rivdet meahccin. 35 Mun luottahuhtán Moabis daid geat oaffaruššet dieváin ja boldet suovvasiid iežaset ipmiliidda, cealká Hearrá. 36 Danne mu váibmu vuobaida dego njurgganas Moaba dihte, mu váibmu čierru Kir-Heresa ássiid njurgganasa láhkái. Buot valljugasvuohta maid sii leat háhkan, lea duššan. 37 Juohke oaivi lea báljis, buohkaid skávžžát leat ráhkejuvvon. Juohkehaš lea nájadan gieđaidis, buohkaid alimiid birra lea seahkka. 38 Moaba viesuid dáhkiin ja šiljuin gullo dušše váidalus. Mun lean cuvken Moaba dego lihti mas ii oktage fuola, cealká Hearrá. 39 Dat lea cuovkanan. Vuobaidehket! Moab lea báhtaran heahpanemiin, dál dan ránnját boagustit dan ja gáfestuvvet dan vuorbbi.
40 Ná cealká Hearrá:
Son falleha Moaba dego goaskin,
leapposoajáid!
41 Gávpogat váldojuvvojit,
ladnit gahččet.
Dan beaivvi Moaba sáŋgárat
leat dego nisson mánnáheađis.
42 Moab duššaduvvo,
nu ahte dat ii šat leat álbmot;
dat lea goarggastallan Hearrá vuostá.
43 Hirbma ja roggi ja giella
vurdet du gii ásat Moabis,
cealká Hearrá.
44 Gii báhtara hirpmas,
gahččá roggái,
ja gii beassá rokkis,
čákŋá gillii.
Dat jahki lea lahka
go mun ráŋggáštan Moaba, cealká Hearrá.
45 Hešbona suoivanis
čužžot vuoimmehuvvan báhtareaddjit.
Hešbonis vuolgá dolla,
Sihonis dollanjuovčča.
Dat boaldá Moaba gállu,
šlámaideddjiid oaivečohka.
46 Vuoi du, Moab!
Kemoša álbmot lea duššan!
Du bártnit dolvojuvvojit giddagassii,
du nieiddat fáŋgavuhtii.
47 Muhto boahtti beivviid mun jorgalan Moaba vuorbbi, cealká Hearrá.
Dása nohket Moabii celkojuvvon duopmosánit.