Job vástida Sofarii
1 De Job sártnui:
2 Guldalehket juo maid mun dajan,
udnojehket munnje dan jeđđehusa!
3 Girdet mu go mun sártnun,
ja go lean geargan,
de oažžubehtet bilkidit.
4 Olbmuidgo mun lean váidaleamen?
Almma mus lea sivva leat gierdameahttun!
5 Gehččet munnje, de soaigibehtet
ja bidjabehtet gieđa njálmmi ovdii.
6 Mun suorganan go smiehtan dán,
mu rumaš doarggista.
7 Manne ipmilmeahttumat
besset eallit boarisin
ja velá ovdánit buori dillái?
8 Sin mánát ellet oadjebassan sin luhtte,
mánáidmánát leat sin čalmmiid illu.
9 Sin viesuin ii leat mihkkege mas ballat,
Ipmila spižát eai deaivva sidjiide.
10 Sin vuovssát čoavjudit eaige stajit,
sin gusat guddet eaige reito.
11 Mánáideaset sii luitet olggos
dego sávzzaid,
sin bártnážat njuikkodit sin birra,
12 lávlot ja čuojahit rumbbu ja lyra,
ávvudallet go njurgganasat čudjet.
13 Sin beaivvit leat lihkolaš beaivvit,
ja ráfálaččat sii mannet jábmiidáibmui.
14 Dattetge sii dadjet Ipmilii:
“Divtte min orrut!
Mii eat beroš dovdat du geainnuid.
15 Gii lea Buotveagalaš,
manne mii galggašeimmet bálvalit su?
Maid min ávkkuha rohkadallat su?”
16 Sii váldet lihku iežaset gihtii,
sii mearridit áigumušaideaset ieža
eaige váldde vuhtii Ipmila.
17 Man dávjá čáská
ipmilmeahttumiid lámpá?
Goas lihkuhisvuohta deaivida sin,
goas sii ožžot oasiset
Ipmila moari časkkástagain?
18 Vare sii šattašedje oalggaid láhkái
biekka ovddas
nugo sáđut maid riđđu njávkkasta eret?
19 Vurkego Ipmil lihkuhisvuođa
ipmilmeahttuma mánáide?
Ii fal nu!
Mávssahehkos Ipmil sutnje alccesis,
gillájehkos son ieš iežas ráŋggáštusa!
20 Muosáhehkos son iežas heavvaneami,
juhkos son Buotveagalačča moari geara!
21 Maid son šat fuollá iežas mánáin,
go su mánuid lohku lea dievvan?
22 Áigugo olmmoš oahpahit viissisvuođa
Ipmilii, stuorráid duopmárii?
23 Muhtin jápmá
gaskan buoremus searaidis,
oadjebassan ja ráfálaččat.
24 Su rumaš lea máihlái, su dávttit ađđát.
25 Nubbi jápmá bahča morrašis,
iige son goassege leat beassan
návddašit eallima buorrevuođa.
26 Goappašagat biddjojuvvoba muldii,
ja máđut gokčet sudno.
27 Gal mun dieđán maid dii jurddašehpet,
makkár juonaiguin dii áigubehtet giellat mu!
28 Diihan dadjabehtet:
“Gos dál lea oaivámučča visti,
gos suttolaččaid goađit?”
29 Jerret mat dakkáriin geat johtet viidát,
váldet vuhtii maid sii muitalit:
30 Bahás olmmoš sestojuvvo
lihkuhisvuođa beaivvi,
son dolvojuvvo suodjái
go moari beaivi boahtá.
31 Gii cuiggoda sutnje čalbmehálgui
su heajos eallima,
gii mávssaha sutnje
dan maid son lea dahkan?
32 Ja go son guddojuvvo hávdái,
de olbmot gohcet su hávdečoma guoras,
33 ja njálggat lea su vuoiŋŋadus
leagi muoldda siste.
Su maŋŋil mannet buot olbmot,
ja dat geat manne su ovdal,
leat lohkameahttumat.
34 Din jeđđehus lea duššálaš,
din vástádusain lea aivve behtolašvuohta.