1 Dongo bivddát ledjonii sállaša,
dongo biepmat ledjončivggaid,
2 go dat čákŋet biejuidasaset
dahje vuđgŋet suovkkas?
3 Gii háhká gáranassii biepmu,
go dan nelgon čivggat ráhkot
veahki Ipmilis
ja njuikkodit duohkot deike?
4 Dieđátgo don áiggi
goas várregáica guoddá,
gozihatgo don sarvvaálddu ávttaid?
5 Dieđátgo don daid rievttes bottu,
logatgo don daid čoavjjetáiggi mánuid?
6 Dat čegŋejit, guddet misiideaset
ja de leat beassan bákčasiinniset.
7 Daid miesit sturrot ja givrot meahcis,
ruohtastit eret eaige šat máhca.
8 Gii lea luoitán meahcceásena
veaittalassii,
gii lea čoavdán dan báttiid?
9 Mun adden dasa duolbadasa viessun,
sáltemeahci ássansadjin.
10 Dat boagusta gávpoga rieja,
ii dat gula vuojeheaddji čuorvasiid.
11 Dat časkkáhaddá váriin,
doppe leat dan guohtunsajit,
dat ohcá buot dan mii lea ruonas.
12 Gárrugo meahccevuoksá bálvalit du,
dáhttugo dat idjadit du kruppá bálddas?
13 Sáhtátgo bágget dan
suittehiiguin jorgunluddii,
fidnetgo dan hárvet duolbadasa?
14 Duosttatgo luohttit
dan stuorra givrodahkii,
oskkildit dasa buot rahčamiiddát?
15 Gáttátgo dainna rádjat šattuidat,
datgo buktá du gortniid
gordneráidnensadjái?
16 Struhcca rámšku soajáidisguin,
muhto dan soaját eai leat
dego háigira ja fálli soaját.
17 Dat monne eatnamii
ja diktá moniidis hávdašuvvat sáddos.
18 Ii dat jurddaš ahte juolgi
sáhttá njuvddestit daid cuovkkas
ja meahcispiret vedjet daid cuvket.
19 Dat lea garas čivggaidasas,
dego dat eai oppa livččege su čivggat.
Ii dat bala ahte dan rahčamuš
manná duššás.
20 Ipmil biehttalii das jierpmi,
ii addán dasa ipmárdusa.
21 Go dat girddiha ovdan,
de dat heahppášuhttá heastta
ja riidejeaddji.
22 Dongo leat addán hestii dan fámu,
dongo leat gárvvuhan
dan čeabeha livjáheaddji hárješuovkkain?
23 Dongo oahpahit dan njuikkodit
dego rásselohkku?
Dan gorges rusádeapmi suorggaha.
24 Dat guohkká eatnama jierrásit,
dat falle vašálačča vearjjuid vuostá.
25 Dat boagusta vára iige suorgan,
ii dat báhtar miehkis.
26 Dan birra šuvvet njuolat,
šealgu sáiti ja sábel.
27 Deama ja juma dat vuolgá johtui,
ii dat leat caggamis go dorve čuodjá.
28 Dat šnjirgu jitnosit
go gullá dorvve čuodjamin,
juo guhkkin dat áicá soađi,
oaivámuččaid gohččunjienaid
ja soahtečuorvasiid.
29 Du jierbmigo bidjá fálli girdilit,
go dat lebbe soajáid ja dolle lulás?
30 Gohčutgo don goaskima
badjánit áibmui
ja hukset beasi allagassii?
31 Dat ássá bávtti alde,
doppe lea dan idjasuodji,
bajimusas várrečohkas.
32 Doppe dat várdáda borramuša,
guhkkin dan čalmmit oidnet maid fallehit.
33 Dan čivggat borret varrás sállaša,
gos fal ráppit, doppe datnai.
34 Hearrá celkkii Jobii:
35 Áigugo láiti sivahaddat Buotveagalačča?
Dat gii láitá Ipmila, ferte vástidit!
Job vástida
36 Job vástidii Hearrái:
37 Mun lean headju,
maid mun máhtášin vástidit dutnje?
Mun bijan gieđa njálmmi ovdii.
38 Oktii mun sárdnon inge šat jietnat,
guovtte geardde, inge šat daja maidege.