1 Dat lea ilá hirpmus,
ii oktage leat nu jállu
ahte duosttašii hárdit dan.
Gii duostá loaiddastit dan ovdii?
2 Gii máhttá dearvan hástalit dan,
gii oppa almmi vuolde?
3 Mun muitalan vel
makkárat leat dan lahtut,
makkár dan fápmu
ja man imašlaš dan hápmi.
4 Gii nuollá dan olgguldasgárvvu,
gii ráigá dan guovttegeardásaš gara?
5 Gii rahpá dan soalvvi?
Dan bániin lea balddáhus.
6 Čielggis das leat galbaráiddut,
giddejuvvon lávga dego seaillain.
7 Nubbi lávgá nuppiin,
ii jiellage beasa daid gaskka.
8 Galbbat leat gittalagaid,
dat roahkkásit oktii eaige earránatta.
9 Go dat russu, dalle šleađgu čuovga,
dan čalmmit báitet dego iđitroađđi.
10 Buolli dolla girdá dan njálmmis,
das riššet čuotnamat.
11 Dan njunneráiggiin badjána suovva
dego báhkaduvvon, duoldi ruittus.
12 Dan vuoiŋŋanas cahkkeha čađaid,
dolla njuoršu dan njálmmis.
13 Fápmu orru dan niskkis,
ballu viehká dan ovddabeale.
14 Dan čoavjji máhcit leat stargasat,
dat leat dego leikejuvvon eaige lihkas.
15 Dan raddi lea garas nugo geađgi,
garas dego vuolit millogeađgi.
16 Go dat čuožžila, de fámolaččat soiget,
meara doajáhagatge báhtarit das.
17 Falleheaddji miehkki ii bastte dasa,
ii sáiti, skohtal iige njuolla.
18 Ruovdi lea dasa nugo oalga
ja bronsa dego mieska muorra.
19 Njuolla ii balddit dan báhtarussii,
šleŋggona geađggit leat dasa dego sáđđu.
20 Dat atná šluppoha oalgan,
sábeliid skála dat dušše boagusta.
21 Čoavjji vuolde das leat bastilis biikkat,
dat johtá rábihis dego gordneluvvenreahka.
22 Dat duldeha čiekŋalasa dego ruittu,
dat dahká ábi duoldi vuoiddasgievdnin.
23 Dan maŋŋái báhcá čuovgi bálggis,
dego čiekŋalas livččii ožžon čurges vuovttaid.
24 Nubbi dan láhkásaš ii leat eatnama alde,
dat lea sivdniduvvon dakkáražžan
mii ii suorgan.
25 Čeavlátge ballet das,
dat lea buot goargadis spiriid gonagas.