Josua

Vuoittáhallan gonagasat

¹ Dát leigga dat gonagasaguovttos geat vuoittáhalaiga israellaččaide ja geaid eatnamiid sii válde oapmineaset Jordana don bealde, nuorttabealde, Arnonleagi rájes gitta Hermonvári rádjái, oppa Jordanleagi nuorttabeali: ² Nubbi lei Sihon, amorlaččaid gonagas: Son ásai Hešbonis ja ráđđii beali Gileadis. Su eatnama lullerádjá vulggii Aroeris Arnonjohkaleagi ravddas ja manai joga mielde. Davvin su eanan olii Jabbokjohkii, ammonlaččaid eatnama rádjájohkii, ³ ja dasa gulai Jordanleagi nuorttabealli Gennesaretjávrris Arabamerrii dahjege Jápmamerrii Bet-Haješimota rádjái ja lulás Pisga vuollái. ⁴ Israellaččat válde maiddái Oga, Bašana gonagasa, eatnama. Son gulai maŋimuš refalaččaide, ja su hálddahusgávpogat ledje Aštarot ja Edrei. ⁵ Oga eatnamii gulai oppa Basan Hermonvári ja Salka rádjái ja gitta gešurlaččaid ja maakalaččaid eatnama rádjái ja vel bealli Gileadis gitta Sihona, Hešbona gonagasa, eatnama rádjái. ⁶ Sihon ja Og vuoittáhalaiga Hearrá bálvaleaddjái Mosesii ja israellaččaide, ja Moses attii sudno eatnamiid opmodahkan Rubena ja Gada čearddaide ja Manasse čeardabeallái.

⁷ Dás logahallojuvvojit dat gonagasat geat vuoittáhalle Josuai ja israellaččaide Jordana oarjjabealde. Dáid gonagasaid eatnamat olle Baal-Gada rájes Libanonleagis gitta Halakvári rádjái Seira guvlui. Daid eatnamiid Josua juogadii Israela čearddaide oapmin, ⁸ go son lei vuoitán hetlaččaid, amorlaččaid, kanaanlaččaid, perisselaččaid, hivvelaččaid ja jebuslaččaid geat ásse várreeatnamis, Šefelas, Jordanleagis, vilttiin, meahcis ja Negevis. ⁹ Vuoittáhallan gonagasat ledje: Jeriko gonagas ja Aja gonagas; Ai lea Betela lahka, ¹⁰ Jerusalema gonagas, Hebrona gonagas, ¹¹ Jarmuta gonagas, Lakiša gonagas, ¹² Eglona gonagas, Gesera gonagas, ¹³ Debira gonagas, Gedera gonagas, ¹⁴ Horma gonagas, Arada gonagas, ¹⁵ Libna gonagas, Adullama gonagas, ¹⁶ Makkeda gonagas, Betela gonagas, ¹⁷ Tappuaha gonagas, Hefera gonagas, ¹⁸ Afeka gonagas; Afek lea Sarona lahka, ¹⁹ Madona gonagas, Hasora gonagas, ²⁰ Šimrona gonagas, Merona gonagas, Akšafa gonagas, ²¹ Taanaka gonagas, Megiddo gonagas, ²² Kedeša gonagas, Jokneama gonagas; Jokneam lea Karmela vuolde, ²³ Dora gonagas; Dor lea Dora alážiid vuolde, Gojima gonagas; Gojim lea Galileas, ²⁴ ja Tirsa gonagas. Gonagasat ledje oktiibuot golbmalogiokta.