Laavkoje Jåhha båata
1 Bueriesaernie Jeesus Kristusen, Jupmelen Baernien bïjre, naemhtie aalka: 2 Profeete Jesaian gærjesne tjaalasovveme:
Vuartesjh, dïjreguedtijem dov åvtelen raajem,gie dutnjien geajnoem röönjie.3 Miehtjies dajvesne gylje:Jolkesjh Jupmielasse geajnoem,jïh riektedh altasasse baalkah!4 Nemhtie laavkoje Jåhha eelki miehtjies dajvesne almetjidie ööhpehtidh edtjieh jarkedh jïh lååvkesovvedh jïh jïjtsh sådtojste luajhtasovvedh. 5 Gaajhkh almetjh abpe Judejeste jïh Jerusalemeste altese gåajkoe böötin. Dejtie Jordanen johkesne laavkoeji juktie jïjtsh sådtojde boejhkesjin. 6 Jåhhan njåetsie kameelen goelkeste maam garhtse-beelhtine gårrestamme. Kraesie-njålhtjah jïh hååneskem byöpmedi. 7 Naemhtie boejhkeli: «Mov mænngan dïhte båata gie manneste veaksahkåbpoe. Im leah manne vyörtege altese sandaale-garhtsem noeledh. 8 Manne leam tjaetsine dijjem lååvkeme, dïhte jis galka Aejlies Voejkeninie laavkodh.»
Jeesusen laavkome jïh gïehtjelimmie
9 Dennie gaskesne Jeesuse Nasareteste, Galilejeste bööti, jïh Jåhha altemse Jordanesne laavkoeji. 10 Dallah gosse Jeesuse tjaetseste tjuedtjele, dellie vuajna elmierïjhke rïhpesåvva jïh Voejkene jïjtse gåajkoe goh ledtie suaja. 11 Jïh dellie gïele elmierïjhkeste govloe: «Datne mov gieries Baernie, guhte mov mïelesne.»
12 Dan mænngan Voejkene Jeesusem miehtjies dajvese voelkehti, 13 jïh Jeesuse debpene njieljieluhkie biejjieh årroeji, jïh Satan Jeesusem gïehtjeli. Vaejsjiej luvnie jogresti; jïh eengkelh altemse viehkiehtin.
Dah voestes learohkh
14 Gosse Jåhham faangkegåatan tsaakeme, dellie Jeesuse Galilejese bööti jïh Jupmelen bueriesaerniem ööhpehti, 15 jïh naemhtie jeehti: «Biejjie jæjhteme, Jupmelen rïjhke gïetskesne. Jarkajidie jïh jaehkede bueriesaerniem!» 16 Ikth gosse Galileja-jaevrien gaedtiebealam vaedtsieminie, dellie Simonem jïh altese vïellem Andreasem vuajnije gosse ligan viermieh jadtehteminie juktie göölijh ligan. 17 Dellie Jeesuse jeahta: «Dåeriedidien mannem; edtjem dotnem almetje-göölijinie darjodh!» 18 Dallah viermide luejhtieligan jïh Jeesusem dåeriedigan. 19 Gosse Jeesuse ånnetji guhkiebasse båata, dellie Sebedaiosen elkide, Jaahke gonnoeh Jåhham vuajnije. Dah lægan vïnhtsesne viermieh doengeminie. 20 Dejtie jïjtse gåajkoe gohtje, jïh dah jis Sebedaiosem, aehtjemse, vïnhtsese laehpielægan trïengkigujmie, jïh Jeesusem dåeriedægan.
Kafar-naumesne
21 Kafar-naumese böötin vaedtsien. Gosse sabbaate sjïdti, dellie synagogese tjaangi jïh almetjidie ööhpehti. 22 Dah jis eevre geagkarin dehtie ööhpehtimmeste juktie faamojne ööhpehti; idtji guktie dah tjaaleh-åahpetjh. 23 Dennie synagogesne jis ålma gïem doen´aajmoe doerelamme. Dïhte gæljede: 24 «Maam edtjh datne Jeesuse, gie Nasareteste lea, mijjine? Dagke båateme mijjem mïrhkedh? Daajram gujht gie leah: Jupmelen eejleskodtje!» 25 Mohte Jeesuse doen´aajmoem aejhteste: «Årroeh sjeavohth jïh luejhtieh daam almetjem!» 26 Jïh doen´aajmoe almetjem struvkie, snjæjroen daaresje, luejhtele jïh vualka. 27 Gaajhkesh alvehtovvin jïh sinsitniem gihtjin: «Mij amma daate jis? Orre faamohks jïh veaksehks bïhkedasse? Doenide aaj byödte guktie luvrieh.» 28 Jïh såaltje dan bïjre abpe Galilejam juhtieji.
Simonen vuanove skïemtjes
29 Synagogeste vaadtsajin Simon gonnoeh Andreasen gåajkoe. Jaahke gonnoeh Jåhhah dåeriedigan. 30 Desnie Simonen vuanove skïemtjes, vaejline gællan. Dam Jeesusasse saerniestin. 31 Nyjsenæjjan gåajkoe vaadtsa, gïeteste vaalta jïh viehkehte tjuedtjielidh. Vaejlie luejhtele jïh nyjsenæjja åadtjoeji jïjtse guesside gåassoehtidh.
32 Iehkeden gosse biejjie luajhtadamme, dellie Jeesusasse gaajhkh skïemtje almetjh bööktin dovne dejtie gïeh doen´aajmosne. 33 Staaren gaajhkh almetjh lin oksen uvte tjåanghkenamme. 34 Jïjnjh almetjh ovmesh skïemtjelassijste starnedehtieji, jïh jïjnjesijstie doen´aajmoeh aeskieli. Idtji doenide luhpedh maam gænnah jiehtedh juktie dah deejrin gie Jeesuse.
Jeesuse rohkele jïh ööhpehte
35 Jemhkieldisnie, aereden vööste, dellie tjuedtjele jïh miehtjies dajvese vaadtsa jïh debpene rohkele. 36 Simon jïh dah mubpieh jis skudtieh altese minngesne. 37 Gosse jeksieh, dellie jiehtieh: «Gaajhkesh datnem ohtsedeminie!» 38 Jeesuse vaestede: «Mïnnebe guhkiebasse duejtie staaretjidie daajkoe håalodh. Dan gaavhtan leam båateme.»
39 Dan mænngan abpe Galilejan synagogi mietie vaadtsehtji saarnoeji jïh doenh almetjijstie aeskieli.
Lepro-skïemtje ålma
40 Lepro-skïemtje ålma Jeesusen gåajkoe båata, slienghkehte jïh birrie: «Jis sïjhth, dellie maahtah mannem raajne darjodh!» 41 Jeesuse almetjem aarmode, gïetem geelkie, doehtede jïh jeahta: «Manne sïjhtem! Sjïdth raajne!» 42 Lepro-skïemtjelasse dallah luejhtieli jïh ålma raajne sjïdti. 43 Jeesuse stillie edtja dallah vaadtsajidh 44 jïh norhte: «Aellieh daam gïese saarnoeh! Vaarrh hearraj gåajkoe jïh vuesehth jïjtjemdh jïh vaeltieh sjïelh meatan guktie Mose stilleme gosse raajne sjïdteme. Dïhte galka hearride væhtine årrodh.»
45 Ålma læjhkan vöölki soptsesti jïh gaajhkene lehkesne saarnoeji. Nemhtie dam idtji Jeesuse vielie maehtieh naan staarese båetedh. Staari bæjngolen jïh miehtjies dajvine jogresti. Almetjh altese gåajkoe gaajhkede lehkeste böötin.