Heelsegh
1 Pöövle jïh Timoteus, Kristus Jeesusen deanerh, gaajhkide Kristusen aejlieskodtjide healsoehtien gïeh Filipposisnie årroeminie, dovne dijjen åvtehkidie jïh diakonide healsoehtien. 2 Jupmelen, mijjen Aehtjien jïh Åejvie Jeesus Kristusen aarmoe jïh raeffie dijjine årroeh!
Gyjhtelassh jïh rohkelassh
3 Iktesth mov Jupmelem gæjhtam gosse dijjem måjhtijem, 4 jïh iktesth gosse rohkelem, aavosne dijjen åvteste rohkelem. 5 Juktie voestes biejjeste jïh daan beajjan lidie mannine aktesne vaentjelem nænnoestamme. 6 Jearsoe leam juktie dïhte gie buerie dahkoem dijjine eelki, edtja dam Kristus Jeesusen beajjan illedh. 7 Rïektes lea gosse dijjen bïjre numhtie ussjedem. Dijjieh hov mov vaajmosne. Dovne gosse svaalhtesh guadtam dovne gosse vaentjelem vaarjelem jïh vihtestem, dellie dijjieh aarmosne mannine aktesne. 8 Jupmele maahta vïhnesjidh manne Kristus Jeesusen vaajmojne dijjen gåajkoe arhtem.
9 Rohkelem dijjen gieriesvoete edtja gaarsjaldovvedh jïh jiermeste jïh vijsiesvoeteste dïevedh 10 guktie edtjede guarkedh jïh vierhtiedidh mij vihkele, jïh Kristusen biejjien raajne jïh liejmien namhtah tjåadtjodh, 11 jïh dïeve rïektesvoeten sjædtojste mah Jeesus Kristusinie sjidtieh Jupmelen hearlohkevoetese jïh earose.
Svaalhtesh Kristusen gielhtie guadtam
12 Åerpenh, sïjhtem dijjieh galkede daejredh dïhte mij munnjien sjïdteme, vaentjelem evtiedamme. 13 Daajroes abpe båarkesne jïh gaajhkesidie manne Kristusen gielhtie svaalhtesh guadtam. 14 Svaalhtesi gielhtie jïjnjesh åerpienijstie Åajvan tjarkebe goh aerebe leajhtadieh guktie Baakoem tjarkadieh saerniedidh. 15 Såemies gujht Kristusem saerniedieh juktie kraamedieh jïh sijhtieh dïjveldidh, jïh såemies Kristusem buerie vaajmojne saerniedieh. 16 Gieriesvoeten gielhtie saerniedieh juktie daejrieh manne stillesovveme vaentjelem vaarjelidh. 17 Dah gïeh kraamedieh, vienhtieh sijjieh maehtieh mov svaalhtesidie löövlebe darjodh. 18 Guktie dellie? Kristuse hov såårnesåvva jalhts nåake jallh buerie åssjalommesigujmie såårnesåvva, jïh dellie manne aavodem.
Båetije biejjide edtjem aavoedidh. 19 Juktie daajram destie edtjem gorredovvedh, gosse dijjieh mov gaavhtan rohkelidie jïh Jeesus Kristuse mannem viehkehte. 20 Manne vuartam jïh håhkesjem im galkh skaamojne sjïdtedh. Daelie goh iktesth Kristusem mov krehpine heevehtem juktie edtjem jieledh jallh jaemedh.
21 Kristuse lea mov jielede, jïh jaemede mov vitneme. 22 Jis åadtjoem jieledh, dellie maahtam buerie sjædtoeh guedtedh. Im daejrieh maam edtjem veeljedh. 23 Damtem gåabpegen bealan sïjhtem: sïjhtem vuelkedh jïh Kristusen luvnie årrodh juktie dïhte sagke buerebe. 24 Mohte dijjese buerebe gosse manne jealam. 25 Juktie dïsse leajhtedem, dellie daajram edtjem jieledh jïh dijjen luvnie årrodh dijjem viehkiehtidh guktie dijjieh jaahkosne evtiedimmiem jïh aavoem åadtjode. 26 Dellie edtjede mov gielhtie geerjene jïh mavvas Jeesus Kristusinie årrodh gosse dijjen gåajkoe båatam.
Gæmhpode vaentjelen gaavhtan
27 Veasode dellie guktie Kristusen vaentjelen mietie edtjede. Mejtie manne båatam dijjem gaavnesjidh jallh im båetieh, baajede mannem daejredh dijjieh aajne mïeline lidie jïh aktesne gæmhpode vaentjelen jaahkoen gaavhtan, 28 jïh idie gåessie vuestiehkijstie bïllh. Dellie Jupmele daejrehte dah gelkieh smualkedh jïh dijjieh gorredovvedh. 29 Juktie Kristusen gielhtie lidie aarmoem åådtjeme Kristusasse jaehkedh jïh Kristusen gielhtie vaejviedidh. 30 Dijjieh gæmhpode guktie vööjnidh manne gæmhpoejim, jïh daelie govlede manne annje gæmhpoeminie.