1 Váimmu jurdagat gullet olbmui,
muhto vástádusa addá Hearrá.
2 Buot olbmo geainnut leat buhttásat
su iežas čalmmiin,
muhto Hearrá geahččala
olbmo vuoiŋŋa.
3 Bija Hearrá háldui buot maid dagat,
de du áigumušat lihkostuvvet.
4 Hearrá lea sivdnidan buot
dihto ulbmila várás,
ipmilmeahttumage
lihkuhisvuođa beaivái.
5 Hearrá fasttáša
juohke čeavlás olbmo –
duođaid, eai sii beasa
ráŋggáškeahttá.
6 Árbmugasvuohta ja oskkáldasvuohta
soabahit suttu,
Hearrá ballu gáidada olbmo bahás.
7 Go Hearrá liiko olbmo geainnuide,
de son oažžu ráfi velá vašálaččaidisguinge.
8 Buoret uhccánaš vuoigatvuođas
go stuorra vuoittut vearrivuođas.
9 Olmmoš jurddaša iežas geainnu,
muhto Hearrá stivre su lávkkiid.
10 Gonagasa sátni
lea Ipmila mearrádus,
dubmedettiin son ii meaddát.
11 Rivttes veavttat gullet Hearrái,
son lea dahkan buot veaktageđggiid.
12 Gonagasat fasttášit ipmilmeahttun
meanuid,
dasgo vanhurskkisvuohta
nanne truvnnu.
13 Vuoigatlaš sárdnun
lea gonagasa miela mielde,
son ráhkista dan gii sárdnu duođa.
14 Gonagasa moarri lea jápmima áirras,
muhto viissis olmmái
jaskkodahttá su.
15 Gonagasa muođuid čuovga
mearkkaša eallima,
su buorredáhtolašvuohta
lea dego giđđaarvi.
16 Buoret go golli
lea háhkat viissisvuođa,
mávssoleabbo go silba
lea háhkat jierpmi.
17 Vuoigatlaččaid geaidnu garvá bahá,
heakkas várjala dat gii dárko lávkkiidis.
18 Čeavli doalvu hevvui,
goargatvuohta doalvu jorraleapmái.
19 Buoret eallit vuollegažžan
ovttas vártnuhemiiguin
go juogadit sállaša čeavlás olbmuiguin.
20 Dat gii bargá jierpmálaččat,
gávdná buriid,
ávdugas dat gii dorvvasta Hearrái.
21 Dat geas lea viissis váibmu,
gohčoduvvo jierpmálažžan,
sánálašvuohta jáhkiha olbmo.
22 Jierbmi lea viisásii eallima ája,
dovkkiid ráŋggáštus
lea sin iežaset jallavuohta.
23 Viisá váibmu dahká su njálmmi
jierpmálažžan,
bidjá su baksamiidda ain eambbo oahpa.
24 Ustitlaš sánit leat dego honnet –
njálgát sillui
ja dearvvašlaččat rupmašii.
25 Dat mii orru leamen
rivttes geaidnu
sáhttá dattetge doalvut jápmimii.
26 Bargi olbmo nealgi barggaha su,
su iežas čoavji gevre su.
27 Návccahis olmmái roggá bahávuođa,
su baksamiin buollá duššadeaddji dolla.
28 Juonalaš olmmái dahká bealkkuid,
šláttardeaddji earuha ustibaččaid.
29 Veahkaválddálaš olmmái
fille lagamuččas,
doalvu su geidnui mii ii leat buorre.
30 Dat gii geahččá siđvečalmmiid,
hutká bahá,
gii čárvu baksamiiddis,
lea dan juo ollašuhttán.
31 Čurges vuovttat leat gudnegierdu,
vanhurskkisvuođa geainnus
dat leat gávdnamis.
32 Buoret go soahtesáŋgár
lea gierdavaš olmmoš,
buoret lea ráđđet iežas miela
go váldit gávpoga.
33 Vuorbi suhppejuvvo askái,
muhto Hearrá mearrida bohtosa.