1 Massalaš Agura, Jake bártni, sánit.
Ná sártnui dat olmmái:
Ipmil, mun lean váiban,
Ipmil, mun lean vuoimmehuvvan.
2 Mun lean dego jierpmehis ealli,
mus ii leat olbmo ipmárdus.
3 Mun in leat oahppan viissisvuođa,
mun in leat beassan dovdat Basi.
4 Gii manai albmái ja
máhcai doppe?
Gii čohkkii biekka čorpmaidasas?
Gii giesai čázi iežas biktasa sisa?
Gii mearridii eatnama rájáid?
Mii lea su namma,
mii su bártni namma –
almma don dan dieđát?
5 Buot Ipmila sánit leat buhttásat,
son lea daid galba
geat dorvvastit sutnje.
6 Ale lasit maidege su sániide,
amas sivahit du gielástallin.
7 Guokte ášši mun bivddán dus,
ale biehttal daid mus
nu guhká go mun ealán:
8 Doala behtolašvuođa ja giellása
guhkkin mus eret,
ale atte munnje geafivuođa
alege riggodaga.
Atte munnje dan biepmu
mii lea mu oassi,
9 aman gallánit nu ahte biehttalan du
ja dajan: “Gii lea Hearrá?”
dahje gefot nu ahte suoládan
ja heahppášuhtán Ipmilan nama.
10 Ale guoddal šláva su isidii,
muđui son garuha du,
ja don ráŋggáštuvvot.
11 Muhtun olbmot garuhit áhčiset
eaige buressivdnit eatniset.
12 Muhtun olbmot leat buhttásat
iežaset čalmmiin,
vaikko eai leat bassojuvvon
buhtisin duolvvaineaset.
13 Muhtun olbmuin leat gorges čalmmit
ja čeavlás geahčastagat.
14 Muhtun olbmuin leat miehkit bátnin
ja niibbit oalulin,
vai sii besset borrat vártnuhemiid
eatnamis,
váivvášiid olbmuid logus.
15 Varranjammis leat guokte nieidda:
Atte! ja Atte!
Golmmas leat mat eai gallán,
njealjis eai daja goassege:
“De lea doarvái”:
16 Jábmiidáibmu,
dahppojuvvon eatniheagga,
eanan mii ii gallán čáziin,
ja dolla mii ii goassege cealkke:
“De lea doarvái.”
17 Dat gii geahččá bilkidemiin áhččásis
iige leat gulolaš eadnásis,
das gorssa gáranasat čuggot čalmmiid
ja goaskinčivggat borret daid.
18 Golbma leat maid mun in ipmir,
njeallje mat leat munnje
menddo ovddolaččat:
19 Goaskima geaidnu almmis,
gearbmaša geaidnu bávtti alde,
skiippa geaidnu gasku ábi
ja olbmá geaidnu nuorra nissona lusa.
20 Ná dahká fuorránisson:
Son borada, sihkku njálmmi ja dadjá:
“In mun leat dahkan maidege baháid.”
21 Golbma leat mat doarggistahttet
eatnama,
njeallje maid vuolde eanan ii gierdda:
22 Šlávva gii šaddá gonagassan,
doavki gii borada gallás,
23 hilgojuvvon nisson gii oažžu boatnjá
ja šlávvanisson gii beassá eamidis sadjái.
24 Njealjis leat smávvát
eatnama alde,
dattetge viisábut go viisát:
25 Gotka ii leat gievra,
almmatge dat čoaggá biepmus geasset.
26 Báktemievri ii leat fámolaš,
dattetge dat dahká bieju báktái.
27 Rásselohkuin ii leat gonagas,
muhto dat johttájit dohkiid dohkiid.
28 Steaččalaggá sáhttá dohppet gieđain,
dattetge dan gávdná gonagasa šloahtas.
29 Golmmas lihkadit goargadit,
njealljásis lea gorges johtinláhki:
30 Ledjon, gievrramus ealli
mii ii murdil geange ovddas,
31 vuoncávaris mii vázzá oaivi ceaggut,
bohkká ovddemussan ealus
ja gonagas gii loaiddasta
soahteveaga ovdii.
32 Jos don leat meannudan
jierpmeheamit ja alidan iežat –
jurdilkeahttá dahje dáhtul –
de bija gieđa njálmmi ovdii.
33 Jos girtnut lávcca, de šaddá vuodja,
jos bonjat njuni, de boahtá varra,
jos háhttet olbmo, de buollá bealku.