Sálbma 111
1 Halleluja!
Mun giittán Hearrá oppa váimmustan
vuoigatlaččaid searvvis,
searvegotti gaskkas.
2 Stuorrát leat Hearrá dagut!
Gii daid ráhkista, dat guorahallá daid.
3 Allagat ja imašlaččat leat su dagut,
agálaččat bissu su vanhurskkis váldi.
4 Son diktá min muitit iežas oavdduid.
Váibmoláđis ja árbmugas lea Hearrá,
5 son biebmá daid geat ballet sus,
son muitá lihtus agálaččat.
6 Son čájehii álbmogasas iežas fámu,
go son attii dasa
eará álbmogiid eatnamiid.
7 Buot daguinis son lea
oskkáldas ja vuoiggalaš,
su gohččumat eai rievdda.
8 Dat bissot nanusin álo ja agálaččat,
dat leat dahkkojuvvon
oskkáldasvuođas ja vuoigatvuođas.
9 Son vuolggahii álbmogasas lonástusa,
son ásahii lihtus agálaš áigái.
Su namma lea bassi ja hirbmatlaš!
10 Hearrá ballu lea viissisvuođa álgu,
viissis dat gii dahká su dáhtu.
Su rámádus bissu agálaš áigái.