Sálbma 50
1 Asafa sálbma.
Ipmil, Hearrá Ipmil, lea sárdnon,
son lea rávkan eatnama
beaivváža badjáneami rájes
dan luoitádeami rádjái.
2 Sionis, dievaslaš čábbás,
Ipmil almmustuvvá hearvásvuođastis.
3 Min Ipmil boahtá,
ii son oro jávohaga.
Duššadeaddji dolla
manná su ovddas,
su birra riđđuda sakka.
4 Son rávká almmi badjin,
son rávká eatnama
vai beassá dubmet iežas álbmoga.
5 “Čohkkejehket mu ovdii
oskkáldasaidan,
geat oaffariiguin leat dahkan muinna lihtu.”
6 Albmi gulaha
Ipmila vanhurskkisvuođa.
Son ieš lea duopmár. Sela
7 “Gula, álbmogan,
mun dáhtun sárdnut,
gula Israel, mun várren du.
Mun lean Ipmil, du Ipmil.
8 In mun cuiggot du
du njuovvanoaffariid dihte,
du boaldinoaffarat
leat álo mu ovddas.
9 In mun váldde vuovssáid du viesus
inge bohkáid du gárddiin,
10 dasgo mu leat buot meahcieallit,
buot fuođđut duháhiin váriin.
11 Mun dovddan buot almmi lottiid,
buot mii lihkada eatnama alde,
gullá munnje.
12 Jos mun livččen nealgumin,
de in mun muitalivčče dan dutnje,
dasgo mu lea eanan
ja buot mii dan deavdá.
13 Mungo borašin vuovssáid bierggu,
jugašin bohkáid vara?
14 Oaffaruša giitosa Ipmilii,
doala lohpádusaidat Alimussii.
15 Čuorvvo mu heahtebeaivvi,
de mun gájun du,
ja don máinnut mu.”
16 Muhto ipmilmeahttumii
Ipmil cealká:
“Mii vuoigatvuođaid dus lea
sárdnidit mu báhkkomiid,
mo duosttat váldit mu lihtu njálbmásat,
17 don gii vašuhat bagadusa
ja bálkestat mu sániid
sealggát duohkái?
18 Jos don oainnát suollaga,
de don searvvat suinna,
furrošeddjiiguin
don anát oktavuođa.
19 Don luoittát njálmmis bahávuođa,
du njuovčča botná behtolašvuođa.
20 Don sártnut bahá
iežat vielja vuostá,
bilkidat eatnát bártni.
21 Dakkáriid don dagat,
ja mungo galggašin orrut jávohaga?
Ale gátte ahte mun lean
du láhkásaš.
Muhto mun áiggun cuiggodit du
ja ráŋggáštit du.
22 Váldet dán vuhtii,
dii geat vajáldahttibehtet Ipmila!
Muđui mun gaikkodan din,
iige oktage leat gádjumin.
23 Dat gii oaffaruššá giitosa,
gudnejahttá mu.
Gii vádjola vuoigadis geainnu,
beassá oaidnit ahte Ipmil beastá.”