Sálbma 82
1 Asafa sálbma.
Ipmil loaiddasta ovdan
ipmiliid čoakkalmasas,
son cealká ipmiliidda duomu:
2 “Man guhká dii
dubmebehtet vearrut
ja doarjalehket sivalaččaid? Sela
3 Veahkehehket váivvášiid
ja oarbásiid oažžut vuoigatvuođa,
atnet fuola heajuin ja vártnuhemiin,
4 gádjot rávkkiid ja dárbbašeddjiid,
bestet sin baháid gieđas.
5 Dii ehpet dieđe ehpetge ádde maidege,
dii vádjolehpet seavdnjadasas,
ja eatnama vuođđudusat jurbot.
6 Mun lean cealkán:
Dii lehpet ipmilat,
Alimusa bártnit buohkat,
7 muhto dii jápmibehtet
nugo olmmoš jápmá,
gahččabehtet dego oaivámuš gahččá.”
8 Ipmil, čuožžil dubmet eatnama,
dasgo buot álbmogat leat du opmodat.