Aalkoebaakoe jïh heelsegh
1 Jeesus Kristuse daam dååjrehtassem Jupmielistie åadtjoeji jïjtse deanaridie vuesiehtidh guktie sjædta. Jïjtse eengkelem raaji daam saarnodh jïjtse deanere Jåhhese. 2 Jåhha Jupmelen baakojde jïh Jeesus Kristusen saernide såårneme jïh soptsestamme gaajhkem maam vuajneme. 3 Aavrehke dïhte gie volverimmien baakojde låhka jïh vaarjele dam mij tjaalasovveme. Juktie biejjie båetieminie.
4 Heelsegh Jåhhan luvhtie tjïjhtje Asian åålmegidie. Aarmoe dijjese jïh raeffie dan luvhtie gie lea, gie lij jïh edtja båetedh, jïh tjïjhtje voejkeni luvhtie mah altese åajvemes tjahkes-sijjien uvte tjåadtjoeminie, 5 jïh Jeesus Kristusen luvhtie, saetnies væhnan luvhtie, jaemiedistie voestes reakadamme almetjen luvhtie gie gaajhki gånkaj åejvine lea. Jeesuse mijjem eahtsa jïh mijjem jïjtse vïrrine sådtojste gorredamme 6 jïh mijjem gånkarïjhkine jïh hearrine jïjtse aahtjan, Jupmielasse dorjeme. Jeesusen hearlohkevoete jïh faamoe ihkuve aajkan. Aamen.
7 Vuartesjh, balvine båata!Gaajhkesh altemse vuejnieh.Dah aaj gïeh altemse baskeme.Gaajhkh eatnemen åålmeghdan gielhtie ojkesieh.Nemhtie hov! Aamen.
8 Alfa jïh Omega leam, Jupmele Åejvie jeahta, gie lea, gie lij jïh edtja båetedh – Dïhte veaksahkommes.
Volverimmie Patmosen såålesne
9 Manne, Jåhha, dijjen vïelle gie Jeesusen vaejviem, gånka-earoem jïh vïssjelesvoetem dijjese juakam. Patmosen såålese böötim Jupmelen baakoej jïh Jeesusen saerniej gaavhtan. 10 Åejvien biejjien Voejkene mannem dievhtieji. Dellie reegkes gïelem mov duekesne govlim. Goh basunen tjoeje dïhte. 11 Dellie jeahta: «Tjaelieh gærjese daam maam vuajnah jïh seedtedh tjïjhtje åålmegidie. Dej nomme leah: Efesos, Smyrna, Pergamon, Tyatira, Sardes, Filadelfia jïh Laodikeja.»
12 Dellie jarkelim vuejnedh gie munnjien soptsesteminie. Gosse jarkelamme, dellie tjïjhtje tjoevkejuelkieh gulleste vööjnim. 13 Tjoevkejuelkiej gaskesne akte goh almetjebaernie gåårveldihkie gaaje guhkies njåetsine jïh gulliebeelhtine boengen bïjre. 14 Åejjie jïh voepth vyölkehke goh veelkes ålloe jallh goh lopme, jïh tjelmieh goh dålleskomtjelh. 15 Juelkieh gijkieh goh buelije viejhkie jïh gïele goh borsijes johke. 16 Åelkies gïetesne tjïjhtje naestieh steeri jïh njaelmeste besteles, guektien aavtjoen sviertie bööti jïh ååredæjja goeki goh biejjie faamojne guaka.
17 Gosse dam vööjnim, gahtjim goh jeemege altese juelkiej uvte. Altese åelkies gïetine mannem doehtedi jïh jeehti: «Aellieh maa bïllh! Manne voestes jïh minngemes 18 jïh jielije. Jaameme lim, vuartesjh badth, ihkuve aajkan jealam jïh mov lea jaemeden jïh jaemieh-rïjhken tjoevtenje. 19 Tjaelieh dam maam vuajneme jïh guktie daelie lea jïh dam mij båata. 20 Dah tjïjhtje naestieh mejtie åelkies gïetesne steerim, jïh dah tjïjhtje tjoevkejuelkieh gulleste tjeakoesvoetine leah: tjïjhtje naestieh leah tjïjhtje åålmegi eengkelh, jïh tjïjhtje tjoevkejuelkieh leah tjïjhtje åålmegh.»