Heelsegh
1 Heelsegh Pöövlen, Jeesus Kristusen deaneren luvhtie gie raajesovveme jïh apostelinie veeljesovveme Jupmelen vaentjelem saerniedidh. 2 Dam Jupmele aerebe dåajvoehtamme aejlies tjaalegigujmie mejtie altese profeeth buektiejin. 3 Vaentjele lea altese Baernien, Jeesus Kristusen, mijjen Åejvien bïjre gie almetjinie Daviden boelveste reakadi. 4 Aejliesvoeten Voejkene vihtiestamme Jeesuse Jupmelen faamohks Baernie juktie jaemiedistie tjuedtjielamme. 5 Munnjien vadteme aarmoem jïh stillemem apostelinie sjïdtedh jïh gaajhkide åålmegidie eevtjedh goltelihks jaehkedh altese nommen earose. 6 Dijjieh aaj dagkerh gïeh stillesovveme Jeesus Kristusen årrodh. 7 Dijjese gïeh Romesne, giejtie Jupmele eahtsa, gïeh gohtjesovveme aejlies årrodh, dijjese jeahtam: Aarmoe dijjese jïh raeffie Jupmelen, mijjen Aehtjien jïh Åejvie Jeesus Kristusen luvhtie!
Pöövle Romese sæjhta
8 Eeremasth mov Jupmelem Jeesus Kristusinie dijjen åvteste gæjhtam juktie almetjh abpe veartanisnie dijjen jaahkoen bïjre soptsestieh. 9 Jupmele jïjtje, gïem manne abpe vaajmojne dïenesjem gosse vaentjelem altese Baernien bïjre saernedem, maahta væhnadidh manne iktesth dijjem måjhtam gosse rohkelem. 10 Iktesth rohkelem manne åadtjoem akten biejjien dijjen gåajkoe båetedh, jis dïhte Jupmelen syjhtehtasse. 11 Juktie arhtem dijjem gaavnedidh guktie maahtam Voejkenen vadtesistie dijjese juekedh guktie gaarkh åadtjode, 12 – jallh naemhtie edtjem jiehtedh: guktie dijjieh mannine aktesne maehtede mijjen jaahkojne madtjelovvedh.
13 Åerpenh, edtjede daejredh manne gellien aejkien ussjedamme dijjen gåajkoe båetedh. Im annje jakseme. Juktie manne dijjen luvnie aaj sïjhteme sjædtoeh doksedh seammalaakan goh mubpiej åålmegi luvnie. 14 Lååjkehke leam gaajhkesidie, grekeladtjide jïh barbareladtjide, dejtie gïeh ööhpehtovveme jïh dejtie gïeh eah leah ööhpehtovveme. 15 Dan gielhtie sïjhtem vaentjelem dijjese aaj saerniedidh gïeh Romesne.
Jupmelen faamoe gorrede
16 Im vaentjielistie skaamesjh. Dïhte Jupmelen faamoe mij gaajhkesidie gorrede gïeh jaehkieh, uvtemes juvdeladtjide jïh dellie grekeladtjide. 17 Vaentjele Jupmelen rïektesvoetem vuesehte, jaahkoste jaahkose, guktie tjaalasovveme: Dïhte gie rïektesvoetesne, dïhte jeala.