1 Ipmilmeahttun báhtara
vaikko ii oktage doarrit,
vanhurskkis lea oadjebas dego ledjon.
2 Stuibmás eanan
oažžu eatnat stivrejeddjiid,
muhto viissis ja jierbmás olmmái
stáđásmahttá dili.
3 Oaivámuš gii givssida váivvášiid,
lea dego ráššoarvi
mii doidá gortniid eret bealddus.
4 Láhkarihkkut
rámidit ipmilmeahttuma,
dat geat doahttalit lága,
vuosttaldit su.
5 Bahás olbmot eai ipmir
mii lea riekta,
geat ohcet Hearrá,
áddejit dan ollásit.
6 Buoret gefodat ja
láitemeahttun vádjolus
go riggodat ja moalkás geainnut.
7 Jierbmás bárdni doallá lága,
boreš olbmuid ustit
heahppášuhttá áhčis.
8 Dat gii lasiha riggodagas
reanttuiguin ja vearrevuoittuin,
čohkke dasa
gii árpmiha váivvášiid.
9 Go olmmoš biehttala gullamis lága,
dalle su rohkosge lea fastivuohta.
10 Gii čádjidahttá vuoigatlaččaid,
jorrala iežas roggái,
muhto láitemeahttumat ožžot buori árbbi.
11 Rikkis olmmái atná iežas viissisin,
muhto jierbmás geafi suokkarda su.
12 Go vanhurskásat ožžot fámu,
de hearvásvuohta lea stuoris;
go ipmilmeahttumat allánit,
de olbmot eai dihtto.
13 Gii čiehká suttuidis, ii ane lihku,
gii daid dovddasta ja gáhtá, oažžu árpmu.
14 Ávdugas dat gii álohii ballá Ipmilis,
dat gii buoššuda váimmus,
gahččá oasehisvuhtii.
15 Dego čeargu ledjon
ja speaddji guovža
lea ipmilmeahttun ráđđejeaddji
geafes álbmogii.
16 Dáidemeahttun ráđđejeaddji
givssida álbmoga,
dat gii vašuha vearrevuoittu,
oažžu eallit guhká.
17 Sorbmejeaddji
šaddá báhtarit gitta hávddi rádjái;
allos oktage veahkehehko su.
18 Láitemeahttun vádjola oadjebasat,
dat gii manná moalkás geainnuid,
gahččá roggái.
19 Dat gii bargá iežas bealddu,
oažžu borrat gallás,
dat gii váinnuha duššálašvuođa,
gallehuvvo gefodagain.
20 Ávda olmmái buressivdniduvvo
valljugasat,
dat gii dáhttu riggut johtilit,
ii beasa ráŋggáškeahttá.
21 Ii leat buorre geahččat
olbmo hápmái,
muhto láibebihtá dihtege
olmmoš verroša.
22 Hánis háhpohallá riggodaga,
ii son dieđe ahte heahti lea joksamin su.
23 Dat gii cuiggoda nuppi,
oažžu stuorit giitosa go dat
gii dušše rámida.
24 Dat gii rievida áhčis ja eatnis
ja dadjá: “Ii dat leat suddu” –
son ii leat sorbmejeaddji buoret.
25 Vuovdáivuohta boktá bealkkuid,
dat gii dorvvasta Hearrái, gallehuvvo.
26 Doavki dat
gii dorvvasta iežas jierbmái,
gii vádjola viisát, gáddjojuvvo.
27 Dat gii addá váivvášiidda,
ii gillá vádjitvuođa,
gii dahppá čalmmiidis,
oažžu ollu garuhusaid.
28 Go ipmilmeahttumat allánit,
de olbmot eai dihtto,
go sii duššet,
de vanhurskásat eatnánit.