Bures!
Vállje linnjás muitalusa, ja de bláđe vulos lohkat ja gullat dan.
Giellaválljemis badjin, olgeš bealde, sáhtát válljet giela.
Paulus Damaskusa geainnus
Ođđa risttalaččaid lohku lei lassánan.
Muhto risttalaččat vásihedje vuosttaldeami,
nugo Jesus ge.
Oallugat sis biddjojuvvojedje giddagassii.
Muhtumiid sii godde.
Ja oallugiid oaguhedje báhtarussii.
Saulus lei okta dain áŋgireamos oaguheddjiin.
Son vašuhii risttalaš olbmuid
ja bijai sin giddagassii.
Damaskusis, mii lei ránnáriikka gávpot, orro olu risttalaš olbmot.
Son vulggii Damaskusii váldit sin gitta.
Go lei ollen gávpoga lahka,
de fáhkkestaga šleađggehii almmis girkes čuovga su birra.
Son ii šat oaidnán maidege, ja gahčai eatnamii.
Son gulai jiena čielgasit cealkime:
«Saulus, Saulus, manne doarrádalat mu?»
Son čarvvui čalmmiid ja čuorvvui:
«Hearrá, gii don leat?»
Jietna vástidii:
«Mun lean Jesus, gean don doarrádalat.
Čuožžil, mana gávpogii ja vuordde doppe.»
Saulusa mátkeguoimmit čužžo das jávohaga ja oidne mii dáhpáhuvai.
Sii gulle gal jiena, muhto ii oktage oidnon.
Saulus lihkai fas bajás ja rabastii čalmmiid,
muhto dál son ii oaidnán šat maidege.
Su guoimmit válde su gihtii
ja láidejedje su gávpogii.
Doppe son veallái golbma beaivvi oainnu haga.
Iige son borran, iige juhkan maidege.
Maŋŋel golbma beaivvi dovddai son gieđa iežas gállu nalde,
ja gulai jiena mii dajai:
«Saulus, vieljažan!
Jesus lea vuolggahan mu du lusa
muitalit dutnje ahte don galggat fas oaččut oainnu,
ja Bassi Vuoigŋa deavdá du.»
Dan seammás loggásedje su čalmmiin dego čuopmasat
ja son oinnii njuolga Ananiasa ámadadjui,
guhte lei okta dain risttalaččain Damaskusis.
Sii adde Saulusii borrat, ja de son gásttašuvvui.
Son manai synagogai
gosa juvddálaččat ledje čoagganan,
ja muitalii sidjiide maid Jesus lei dahkan.
Muhto sii dadje: «Ii go dát lea Saulus,
son gii áiggui goddit risttalaččaid?
Ja dál son lea ieš šaddan oktan sis!»
De sii hutkagohte movt sii galge Saulusa goddit.
Go su ođđa ustibat ožžo dan dihtosii,
de sii veahkehedje su báhtarit.
Muhtin ija luite sii su vulos gávpotmuvrra stuora,
bárgiduvvon gore siste.
Son čuožžilii ja manai.
Buot sajiin gos son finai,
muitalii son dan maid Jesus lei dahkan.
Paulusa namma lei álgoálggus Saulus.
Dat namma adno álggos Apostaliid daguin.
Maŋŋel gohčoduvvui son Paulusin. Geahča Apostaliid daguin, kap. 13,9.
Loga muitalusa Biibbalis
1Saul dárai ain vašis ja dáhtui goddit Hearrá máhttájeddjiid. Son manai bajimusbáhpa lusa 2ja ánui sus reivviid Damaskusa synagogaide, vai beasašii váldit gitta dan Geainnu vádjoleddjiid, sihke olbmáid ja nissoniid, ja buktit sin čatnagasas Jerusalemii. 3Go Saul lei mátkkis ja lahkanišgođii Damaskusii, de fáhkkestaga almmis šleađggehii čuovga su birra. 4Son gahčai eatnamii ja gulai jiena cealkimin: “Saul, Saul, manne doarrádalat mu?” 5Son jearai: “Hearrá, gii don leat?” Jietna vástidii: “Mun lean Jesus gean don doarrádalat. 6Čuožžil ja mana gávpogii. Doppe don beasat gullat maid galggat dahkat.” 7Saula mátkeguoimmit čužžo jávohaga. Sii gulle gal jiena, muhto eai oaidnán ovttage. 8Saul lihkai eatnamis, muhto go son rabastii čalmmiid, de son ii oaidnán maidege. Earát láidejedje su gieđas Damaskusii. 9Golmma beaivái son ii oaidnán, ii borran iige juhkan. 10Damaskusis lei máhttájeaddji gean namma lei Ananias. Hearrá celkkii sutnje oainnáhusas: “Ananias!” Son vástidii: “Dás mun lean, Hearrá.” 11Hearrá celkkii: “Mana dan geidnui mii gohčoduvvo Njulgesgeaidnun ja jeara Judasa viesus Saula, Tarsosa olbmo. Son lea rohkadallamin, 12ja oainnáhusas son lea oaidnán ahte Ananias-nammasaš olmmái boahtá sisa ja bidjá gieđaid su ala, vai son oažžu fas oainnu.” 13Ananias vástidii: “Hearrá, mun lean olusiin gullan man ollu baháid dát olmmái lea dahkan du bassi olbmuide Jerusalemis. 14Ja son lea ožžon bajimusbáhpain fápmudusa váldit gitta dáppege buohkaid geat čurvot du nama.” 15Muhto Hearrá celkkii sutnje: “Mana, mun lean válljen su iežan gaskaoapmin, dovddastit mu nama máilmmi álbmogiid ja gonagasaid ja maiddái Israela álbmoga ovddas. 16Mun áiggun čájehit sutnje man ollu son šaddá gillát mu nama dihte.” 17Ananias vulggii. Son manai vissui, bijai gieđaid Saula ala ja dajai: “Saul, vieljažan! Hearrá lea vuolggahan mu, Jesus guhte almmustuvai dutnje go don ledjet boahtimin deike. Son vuolggahii mu, vai don oaččut fas oainnu ja Bassi Vuoigŋa deavdá du.” 18Dan seammás loggásedje Saula čalmmiin dego čuopmasat, ja son oaččui fas oainnu. Son lihkai čuoččat, ja son gásttašuvvui. 19Go son lei boradan, de son áhpásmuvai.Saul orui muhtun áiggi Damaskusis máhttájeddjiid luhtte. 20Dallánaga son sárdnidišgođii synagogain ahte Jesus lea Ipmila Bárdni. 21Buohkat geat gulle su, ovddošedje ja dadje: “Iigo son leat dat olmmái gii Jerusalemis dáhtui duššadit sin geat čurvot dan nama? Iigo son boahtán deike váldit sin gitta ja doalvut sin bajimusbáhpaid gihtii?” 22Muhto Saul nanosmuvai ain eambbo, ja son jávohuhtii Damaskusa juvddálaččaid go čájehii sidjiide ahte Jesus lea Messias. 23Muhtun áiggi geažes juvddálaččat lihtodedje goddit Saula. 24Muhto Saul oaččui diehtit sin áigumušaid. Sii fáktejedje gávpotpoarttaid ija beaivvi, vai besset goddit su, 25muhto muhtun ija máhttájeaddjit veahkehedje su báhtarit ja luite su gore siste gávpotmuvrras vuolás.
9Dalle Bassi Vuoigŋa devddii Saula dahjege Paulusa. Son geahčai olbmái bastilit