9Dát lea Noa ja su soga muitalus. Noa lei vuoigatlaš ja láitemeahttun iežas buolvva gaskkas, ja son vádjolii Ipmiliin. 10Noai riegádedje golbma bártni: Sem, Ham ja Jafet. 11Eanan billašuvai ain eambbo Ipmila čalmmiid vuolde ja veahkaváldi devddii eatnama. 12Go Ipmil geahčadii eatnama, de son oinnii ahte oppa eanan lei billašuvvan, danin go olbmot golahedje eallimeaset bahávuođas. 13Ipmil celkkii Noai: “Mun lean mearridan duššadit buot mii eallá, danne go olbmot leat deavdán eatnama veahkaválddiin. Mun áiggun duššadit sin oktan eatnamiin. 14Hukse alccesat árkka gofermuoras, daga dasa lanjaid ja bihkkat dan siskkil ja olggul. 15Hukse árkka ná: Dan guhkkodat galgá leat golbmačuođi állana, govdodat vihttalogi állana ja allodat golbmalogi állana. 16Hukse árkii dáhki ja bija dan állanveardde állut. Hukse árkii golbma gearddi ja bija dan gilgii uvssa. 17Mun divttán dulvvi gokčat oppa eatnama ja duššadit buot heakkalaččaid almmi vuolde, buot mas lea eallinvuoigŋa. Buot mii lea eatnama alde, duššá. 18Muhto duinna mun dagan lihtu. Don galggat mannat árkii, don ja du bártnit, du áhkká ja du bártniid áhkát oktan duinna. 19Váldde buot heakkalaččain árkii guokte juohke šlájas, varrása ja njiŋŋelasa, vai dat bissot heakkas oktan duinna. 20Lottit, šibihat ja eatnama njoammut, guokte ealli guđege šlájas bohtet du lusa, vai dat bissot heakkas. 21Čohkke fárrui buotlágán borramušaid, vai dutnje ja buot earáide livččii biebmu.” 22Noa dagai buot aiddo nugo Ipmil lei gohččon su dahkat. 1Hearrá celkkii Noai: “Mana oppa joavkkuinat árkii, dasgo mun lean oaidnán ahte dán buolvvas leat dušše don vanhurskkis mu muođuid ovddas. 2Váldde buot buhtis elliin čieža bára, varrásiid ja njiŋŋelasaid, muhto buot buhtismeahttun elliin váldde guokte, varrása ja njiŋŋelasa. 3Váldde maid almmi lottiin čieža bára, varrásiid ja njiŋŋelasaid, vai daid nálli bisošii heakkas eatnama alde. 4Dasgo čieža beaivvi geažes mun vuolggahan eatnama ala arvvi mii bistá njealljelogi beaivvi ja njealljelogi ija. Mun heavahan eatnama alde buot maid lean sivdnidan.” 5Noa dagai buot nugo Hearrá lei gohččon su dahkat. 6Noa lei guhttačuođijahkásaš go dulvi govččai eatnama. 7Noa manai árkii oktan bártniidisguin, áhkáinis ja bártniidis áhkáiguin, vai dulvi ii duššadivčče sin. 8Buhtes ja buhtismeahttun eallit, lottit ja visot eallit mat lihkadit eatnamis, 9manne bárralagaid, varrásat ja njiŋŋelasat, Noa lusa árkii, nugo Ipmil lei cealkán sutnje. 10Go čieža beaivvi ledje vássán, de bohte dulvečázit eatnama ala. 11Dan jagi go Noa lei guhttačuođijahkásaš, nuppi mánu čiežanuppelogát beaivvi, rahpasedje buot čiekŋalasa ádjagat ja almmi dahpaldagat. 12Stuorra arvi šoalai eatnama ala njealljelogi beaivvi ja njealljelogi ija. 13Aiddo dan beaivvi Noa ja su golbma bártni Sem, Ham ja Jafet, su áhkká ja su golbma manji manne árkii. 14Sin lassin árkii manne buotlágán fuođđut, šibihat, smávva eallit mat lihkadit eatnama alde ja buot lottiid ja eará soajálaččaid šlájat. 15Noa lusa árkii bohte buot heakkalaččat báraid báraid, buot mas lei eallinvuoigŋa, 16juohke šlájas varis ja njiŋŋelas, nugo Ipmil lei cealkán Noai. Ja Hearrá dahpai uvssa Noa maŋis. 17Nu bođii dulvi eatnama ala njealljelogi beaivvis. Čáhci dulvvai ja bajidii árkka, ja dat loktanii bajás eatnamis. 18Dulvvai hui sakka ja čázit gokče eatnama, ja árka rievddai čáhcegierragis. 19Ja dulvvai ahte dulvvai, nu ahte čázit gokče velá alimus váriidge mat ledje almmi vuolde. 20Čáhci dulvvai nu ahte dat lei vihttanuppelohkái állana badjel váriid. 21Dalle heavvanedje buot heakkalaččat mat lihkadit eatnama alde, lottit, šibihat, fuođđut ja buot smávva eallit mat guđaidit eatnama alde, ja buot olbmot. 22Buot goikeeatnama eallit jápme, buot main lei eallinvuoigŋa. 23Nu Hearrá heavahii buot heakkalaččaid eatnama alde, olbmuid ja šibihiid, njoammuid ja almmi lottiid; buot daid son heavahii. Dušše Noa ja dat geat ledje suinna árkkas, elle. 24Ja čázit dulve eatnama badjel čuođivihttalogi beaivvi. 1Dalle Ipmil muitái Noa ja buot meahcielliid ja šibihiid mat ledje suinna árkkas, ja son bijai biekka bossut badjel eatnama, ja čáhci coahkugođii. 2Čiekŋalasa ádjagat ja almmi dahpaldagat dahppojedje, heittii arvimis 3ja čáhci coagui maŋistaga eatnama alde. Čuođivihttalogi beaivvi geažes čáhci lei uhccánan nu ollu 4ahte čihččet mánu čiežanuppelogát beaivvi árka bisánii Araratváriide. 5Ja čáhci uhccánii ahte uhccánii gitta logát mánu rádjái. Logát mánu vuosttaš beaivvi ihtigohte várrečohkat. 6Go vel njealljelogi beaivvi ledje vássán, de Noa rabastii árkka ihkkona maid son lei dahkan, 7ja luittii gáranasa girdit. Dat girddašii duohkot deike dassážii go čáhci lei goikan eatnama alde. 8Dasto Noa luittii duvvá girdit vai beassá oaidnit, jogo eanan lei ihtán čázi vuolde. 9Muhto duvvá ii gávdnan seaivunsaji gokko livččii vuoiŋŋastan, ja dat máhcai su lusa árkii, dasgo čáhci govččai ain oppa eatnama. Son geigii gieđa ja válddii duvvá lusas árkii. 10De son vurddii vel čieža beaivvi ja luittii fas duvvá árkkas. 11Go duvvá eahkedisveaiggi máhcai su lusa, de das lei njunis varas oliivamuorralasta. Das Noa árvidii ahte čáhci lei cohkon eatnamis. 12Son vurddii velá ain čieža beaivvi ja luittii fas duvvá girdit, iige dat šat máhccan su lusa. 13Vuosttaš mánu vuosttaš beaivvi dan jagi go Noa devddii guhttačuođi jagi, čázit eai šat gokčan eatnama. De Noa válddii árkka dáhki eret ja oinnii ahte eanan lei goikan. 14Nuppi mánu guoktelogičihččet beaivvi eanan lei goikkis. 15De Ipmil celkkii Noai: 16“Vuolgge árkkas oktan áhkáinat, bártniidatguin ja manjiidatguin. 17Doalvvo olggos buot elliid mat leat du luhtte, buot heakkalaččaid, lottiid, šibihiid ja buot njoammuid mat lihkadit eatnama alde. Giđđudehkoset dat ja lehkoset šattolaččat ja lassánehkoset eatnama alde.” 18De Noa vulggii árkkas oktan bártniidisguin, áhkáinis ja manjiidisguin. 19Ja buot eallit, njoammut ja lottit, buot mat lihkadit eatnama alde, vulge árkkas šlájaideaset mielde. 20Noa ráhkadii áltára Hearrái, válddii buhtis elliid ja buhtis lottiid ja oaffarušai daid boaldinoaffarin áltára alde. 21Go Hearrá havssii soažžudeaddji hája, de son celkkii váimmustis: “Mun in šat goassege garut eatnama olbmo dihte, vaikko olbmo váimmu jurdagat leat bahát nuorravuođa rájes. Mun in šat goassege heavat buot mii eallá, nugo dál dahken. 22Nu guhká go eanan bissu, de ii noga gilvin iige láddjen, ii buolaš iige báhkka, ii geassi iige dálvi, ii beaivi iige idja.”

Les i nettbibelen