Bassivuohta

Dallego Israela álbmot vulggii olggos Egyptas,
čájehii Ipmil sidjiide geainnu gokko galge mannat.
Beaivet son ofelastii sin balvabázzi hámis,
ja ihkku čuovggai son sidjiide dollabázzi hámis.

Israel álbmot vánddardii sáttomeahci čađaja sii orro gođiin.
Muhtin beaivvi dajai Moses:
«Áigi lea dievvan.
Mii ráhkadit goađi iežamet Ipmilii,
bassi báikki gos sáhttit suinna deaivvadit.
Ipmil lea muitalan munnje makkár dat goahti galgá leat.»

De buvttii olles álbmot skeaŋkkaid.
Sin mielas galggai bassi goahti šaddat čáppahin.

Moses attii dan barggu dáiddárii Besalelii.
Dáiddár oaččui oallugiid searvat dan bargui.
Sii ráhkadedje loavdaga ruksesivnnat náhkis.
Sii ceggejedje akasiamuoras ráhkaduvvon fielluid.
Muhtimat čulde čáppa ovdagokčasa fiinna beallemasláiggis
ja hervejedje daid čáppa čuovgaeŋgel govaiguin.

Dáiddár ráhkadii lihtuárkka akasiamuoras
ja gollis rákaduvvon čuovgaeŋgeliid lohkkái,
ja árkii son bijai geađgetávvaliid main ledje dat logi báhkkoma.
Son ráhkadii maiddái čielga gollis čiežasuorggát gintaljuolggi.

Moses ja álbmot ceggejedje goađi veahkkálagaid,
ja dan birra bidje áiddi čuldojuvvon fiinna beallemas diŋggas.
Saji áiddi ja goađi gaskkas gohčodedje sii ovdašiljun,
ja doppe lei oaffaráltár mas álo bulii dolla.

Go buot lei gárvvis, illudii álbmot.
Sii vurde gelddolaččat mii dál galggai dáhpáhuvvat.
De sii oidne balvabácci, mii lei sin ofelastán,
luoitádeame goađi badjelii ja deavdime dan.
Sii dadje guđet guoibmáseaset: «Gea, Ipmil orru mingaskkas!»

Juohke háve go balva loktanii goađis eret,
vulggii álbmot viidáseappot.
Muhto go balva ii loktanan,
de orro sii das.
Ipmila balva orui birastahttii bassivuođa beaivet,
ja ihkku čuovggai dat dego dolla,
nu guhká go johtaleapmi bisttii.

Loga muitalusa Biibbalis

7Moses lávii cegget goađi siidda olggobeallái viehka guhkes gaskka duohkái siiddas ja gohčodii dan almmustusgoahtin. Juohkehaš gii dáhtui jearrat neavvaga Hearrás, gárttai mannat siidda olggobeallái almmustusgoađi ovdii. 8Juohke háve go Moses lei mannamin goahtái, de israellaččat čuožžiledje, iešguhtege goađis uvssohahkii, ja gehčče Mosesa maŋŋái, dassážii go son lei mannan goahtái. 9Ja go Moses lei mannan goahtái, de balvabázzi njiejai ja orui goađi uvssohagas, ja Hearrá sártnui Mosesiin. 10Go olbmot oidne balvabácci orrumin goađi uvssohagas, de sii čuožžiledje ja gopmirdedje eatnamii, iešguhtege goađis uvssohagas. 11Ja Hearrá sártnui Mosesiin muođus muhtui, nugo olmmoš sárdnu nuppiin olbmuin. Dasto Moses máhcai siidii, muhto su bálvaleaddji, nuorra Josua, Nuna bárdni, ii goassege gáidan goađi luhtte.

Les i nettbibelen