Bassivuohta

Dallego Israela álbmot vulggii olggos Egyptas,
čájehii Ipmil sidjiide geainnu gokko galge mannat.
Beaivet son ofelastii sin balvabácci hámis,
ja ihkku čuovggai son sidjiide dollabácci hámis.

Israel álbmot vánddardii sáttomeahci čađa ja sii orro gođiin.
Muhtin beaivvi dajai Moses:
«Áigi lea dievvan.
Mii ráhkadit goađi iežamet Ipmilii,
bassi báikki gos sáhttit suinna deaivvadit.
Ipmil lea muitalan munnje makkár dat goahti galgá leat.»

De buvttii olles álbmot skeaŋkkaid.
Sin mielas galggai bassi goahti šaddat čáppahin.

Moses attii dan barggu dáiddárii Besalelii.
Dáiddár oaččui oallugiid searvat dan bargui.
Sii ráhkadedje loavdaga ruksesivnnat náhkis.
Sii ceggejedje akasiamuoras ráhkaduvvon fielluid.
Muhtimat čulde čáppa ovdagokčasa fiinna beallemasláiggis
ja hervejedje daid čáppa čuovgaeŋgel govaiguin.

Dáiddár ráhkadii lihtuárkka akasiamuoras
ja gollis ráhkaduvvon čuovgaeŋgeliid lohkkái,
ja árkii son bijai geađgetávvaliid main dat logi báhkkoma ledje.
Son ráhkadii maiddái čiežasuorggát gintaljuolggi čielga gollis.

Moses ja álbmot ceggejedje goađi veahkkálagaid,
ja bidje dan birra áiddi čuldojuvvon fiinna beallemas diŋggas.
Sii gohčodedje ovdašilljun dan saji mii lei áiddi ja goađi gaskkas,
ja doppe lei oaffaráltár mas čađát bulii dolla.
Go buot lei gárvanan, illudii álbmot.
Sii vurde gelddolaččat mii dál galggai dáhpáhuvvat.
De sii oidne balvabácci, mii lei sin ofelastán,
luoitádeame goađi badjelii ja devddii dan.
Sii dadje guđet guoibmáseaset: «Gea, Ipmil orru min gaskkas!»

Juohke háve go balva loktanii goađis eret,
vulggii álbmot viidáseappot.
Muhto go balva ii loktanan,
de orro sii das.
Ipmila balva orui bassivuođa alde beaivet,
ja ihkku čuovggai dat dego dolla,
nu guhká go johtaleapmi bisttii.