19Dát lea muitalus Abrahama bártni Isaka sogas. Abrahamii riegádii Isak. 20Isak lei njealljelogijahkásaš go válddii áhkkán Rebekka, gii lei Paddan Arama aramealačča Betuela nieida ja Labana oabbá. 21Isak rohkadalai Hearrá áhkás ovddas, dasgo Rebekka lei sahkuheapme. Hearrá gulai su rohkadusa, ja Rebekka šattai áhpeheapmin. 22Muhto go mánát norddasteigga goabbat guoimmiska Rebekka goaŧus, de son dajai: “Manin munnje geavvá dáinna lágiin?” Son manai jearrat ráđi Hearrás, 23ja Hearrá celkkii: “Guokte álbmoga leat du goaŧus, dus surggiidit guokte álbmoga. Nubbi álbmot lea gievrrat go nubbi, boarráset bálvala nuorabu.” 24Go dal Rebekka áigi dievai, de son riegádahtii jumežiid. 25Dat gii riegádii vuosttažin, lei ruoksat ja miehtá buot guolgái dego guolgabivttas, ja son oaččui nama Esau. 26De riegádii su viellja, ja son doalai gieđain Esau šušmmis; danin son oaččui nama Jakob. Isak lei guhttalogijahkásaš go soai riegádeigga. 27Go bártnážat stuoruiga, de Esau šattai čeahpes bivdin gii eloštii meahcis, muhto Jakob lei jaskeslunddot olmmái ja orodii siiddas. 28Isak lei váibmil meahcielliid birgui, ja danin son ráhkistii eambbo Esau, muhto Rebekkai Jakob lei ráhkkáseabbo. 29Oktii go Jakob lei málesteamen, de Esau bođii meahcis ja lei váiban. 30Son dajai Jakobii: “Attes munnje veaháš duon ruoksada, duon rukses máli, dasgo mun lean váiban.” Das son oaččui nama Edom. 31Muhto Jakob dajai: “Vuovdde munnje vuos iežat vuosttašriegádeami vuoigatvuođa.” 32Esau vástidii: “Fargga mun gal jámán. Maid mun dalle dagan vuosttašriegádeami vuoigatvuođain?” 33Jakob dajai: “Vuortno vuos munnje.” Nu Esau vuortnui ja vuvddii Jakobii iežas vuosttašriegádeami vuoigatvuođa. 34Dasto Jakob attii sutnje láibbi ja linsamáli. Esau borai ja jugai, čuožžilii ja manai geidnosis. Nu hálbin Esau anii iežas vuosttašriegádeami vuoigatvuođa.

Les i nettbibelen

1Go Isak lei boarásmuvvan ja su čalmmit ledje hedjonan nu ahte son ii šat oaidnán, de son rávkkai lusas boarráset bártnis Esau ja dajai sutnje: “Bártnážan!” Esau vástidii: “Maid, áhčážan?” 2Isak dajai: “Mun lean juo boarásmuvvan, inge dieđe goas jámežan. 3Váldde dal vearjjuidat, njuollaskuohpu ja dávggi, ja gotte munnje juogašlái meahciealli. 4Ráhkat munnje njálgga herskko, dakkára masa mun liikon, vai beasan borrat ja buressivdnidit du ovdal go jámán.” 5Muhto Rebekka gulai go Isak sártnui bártniinis Esauin. Go Esau dasto lei mannan meahccái bivdit áhččásis meahciealli, 6de Rebekka dajai bárdnásis Jakobii: “Mun gullen go du áhčči eske dajai vielljasat Esaui: 7‘Bivdde munnje meahciealli ja ráhkat munnje njálgga biepmu, vai mun beasan buressivdnidit du Hearrá muođuid ovddas ovdal go jámán.’ 8Ja dál, bártnážan, jeagat mu ja daga nugo mun gohčun. 9Viečča munnje ealus guokte gihci, de mun ráhkadan áhččásat njálgga biepmu masa son liiko. 10Doalvvo dan áhččásat, vai son borrá ja de buressivdnida du ovdal go jápmá.” 11Jakob dajai eadnásis: “Muhto mu viellja Esauhan lea guolgás olmmái, ja mun lean guolggaheapme. 12Naba jos áhčči guldala mu? Dalle son atná mu bilkideaddjin, ja mu oassin šaddá garuhus iige buressivdnádus.” 13Eadni dajai sutnje: “Deivos dat garuhus munnje, bártnážan. Gula fal mu ja mana viežžat gihciid.” 14De Jakob vieččai gihciid eadnásis, ja su eadni ráhkadii Isakii njálgga herskko masa son liikui. 15Rebekka válddii boarráset bártnis Esau buoremus biktasiid mat ledje su luhtte goađis, ja gárvvuhii daid nuorat bárdnásis Jakobii. 16Gihcenáhkiid son giesai su gieđaid birra ja su guolggahis čeabeha birra. 17Dasto son attii bártnis Jakoba gihtii herskko ja láibbi maid lei ráhkadan. 18Jakob manai áhčis lusa ja dajai: “Áhčči!” Isak vástidii: “Dá mun lean, bártnážan. Gii don leat?” 19Jakob dajai áhččásis: “Mun lean Esau, du vuosttašriegádeaddji. Mun lean dahkan nugo don gohččot. Lihka čohkut, bora mu báhčin sállaša ja buressivdnit mu.” 20Isak jearai: “Mo don leat dalle nu fargga gávdnan dan, bártnážan?” Jakob vástidii: “Hearrá, du Ipmil, vuolggahii dan mu ovdii.” 21Dalle Isak dajai Jakobii: “Boađe lagabuidda, bártnážan, vai mun beasan guldalit, leatgo don duođaid mu bárdni Esau vai it.” 22Jakob manai áhčis lusa, ja Isak guldalii su ja dajai: “Jietna lea Jakoba jietna, muhto gieđat leat Esau gieđat.” 23Isak ii dovdan Jakoba, danin go su gieđat ledje guolgát dego su vielja Esau gieđat, ja son buressivdnidii Jakoba. 24Isak jearai vel: “Leatgo don duođaid mu bárdni Esau?” Jakob vástidii: “De lean.” 25Dalle Isak dajai: “Buvtte munnje borramuša, vai mun beasan borrat bárdnán sállaša ja buressivdnidit du.” Jakob buvttii sutnje biepmu ja viinni, ja son borai ja jugai. 26De Isak dajai: “Boađe goit lagabuidda ja cummis mu, bártnážan.” 27Jakob manai su lusa ja cummistii su, ja Isak havssii su biktasiid hája. Son buressivdnidii su ja celkkii: “Bárdnán hádja lea dego meahci hádja, meahci maid Hearrá lea buressivdnidan. 28Vare Ipmil attášii dutnje almmi suolnni ja eatnama šattolašvuođa, valljugasat gortni ja viinni. 29Álbmogat bálvalit du, olbmuid čearddat gopmirdit du. Leage vieljaidat ráđđejeaddji. Eatnát bártnit gopmirdit du. Garuhuvvon leat dat geat du garuhit, buressivdniduvvon dat geat du buressivdnidit.” 30Isak lei aiddo geargan buressivdnideames Jakoba ja Jakob lei vuolgán áhčis luhtte, go Esau bođii bivdinmohkis. 31Songe ráhkadii njálgga herskko, buvttii áhččásis ja dajai: “Áhččán, čohkán borrat maid bárdnát lea buktán meahcis, vai beasat buressivdnidit mu.” 32Su áhčči Isak jearai: “Gii don leat?” Esau vástidii: “Mun lean bárdnát Esau, du vuosttašriegádeaddji.” 33Dalle Isak suorganii sakka ja jearai: “Gii dalle lei dat gii gottii meahciealli ja buvttii munnje? Mun borren ovdal go don bohtet ja buressivdnidin su, ja dál son lea buressivdniduvvon.” 34Go Esau gulai áhčis sániid, de son čirrui jitnosit ja bahččagit ja dajai áhččásis: “Buressivdnit muge, áhčážan!” 35Dalle Isak dajai: “Du viellja bođii gávvilvuođain ja válddii buressivdnádusa maid don livččet galgan oažžut.” 36Dalle Esau dajai: “Dan dihte son gohčoduvvoge Jakobin, go son lea juo guovtte geardde beahttán mu. Son válddii mu vuosttašriegádeami vuoigatvuođa, ja dál son lea váldán mu buressivdnádusage!” Esau jearai vel: “Iigo dus leat buressivdnádus mu várásge?” 37Isak vástidii Esaui: “Mun lean bidjan su du hearrán, buot su vieljaid mun lean addán sutnje bálvaleaddjin, ja mun lean addán sutnje gortni ja viinni. Maid mun dalle vel galggan dahkat du ovdii, bártnážan?” 38Esau dajai áhččásis: “Dušše okta buressivdnádusgo dus lea, áhčážan? Buressivdnit muge, áhčážan!” Ja Esau čierui jitnosit. 39Su áhčči Isak dajai sutnje: “Guhkkin eatnama šattolašvuođas lea du ássansadji, almmi suolnni haga. 40Miehkát veagas don ealát, vieljat don šattat bálvalit. Muhto oktii don gaikkihat iežat luovus ja rihpastat su geassá niskkis.” 41Esau anii bahčavuođa Jakoba vuostá dan dihte go Jakob lei ožžon áhči buressivdnádusa, ja son jurddašii: “Fargga boahtá áigi goas moai moraštetne áhččáme. Dalle mun gottán vielljan Jakoba.” 42Go Rebekkai muitaluvvui maid su boarráset bárdni Esau áiggui, de son rávkkai nuorat bártnis Jakoba ja dajai sutnje: “Du vieljas Esaus lea mávssahanmiella, ja son áigu goddit du. 43Bártnážan, daga nugo mun dajan: Báhtar dálán vielljan Labana lusa Harranii. 44Oro su luhtte muhtun áiggi, dassážii go vieljat moarri lea vássán 45ja son lea vajáldahttán maid don dahket sutnje. Dalle mun bijan dutnje sáni ja vieččahan du doppe. Manne mun galggašin massit dudno goappašagaid ovttat beaivvi?” 46Rebekka dajai Isakii: “Mun láittastuvan jámas dáid hetlaš nissoniid dihte. Jos Jakob váldá áhkkán hetlaš nieidda, dakkára go duot guovttos, de manin mun dalle oppa ealánge?”

Les i nettbibelen

1Nu Isak rávkkai Jakoba lusas, buressivdnidii su ja dajai: “Ale váldde áhkkán kanaanlaš nieidda. 2Vuolgge baicca Paddan Aramii, eatnát áhči Betuela bearraša lusa, ja váldde doppe áhká ednot Labana nieiddain. 3Vare Buotveagalaš Ipmil buressivdnidivččii du ja dagašii du šattolažžan ja eatnagin, nu ahte dus šaddet máŋga álbmoga. 4Vare son attášii dutnje ja du nállái Abrahama buressivdnádusa, nu ahte don válddát oapminat dán eatnama maid Ipmil attii Abrahamii ja mas don dál ásat vierisin.” 5De Isak vuolggahii Jakoba mátkái, ja Jakob vulggii Paddan Aramii aramealaš Labana, Betuela bártni, lusa gii lei Jakoba ja Esau eanu. 6Esau gulai ahte Isak lei buressivdnidan Jakoba ja vuolggahan su Paddan Aramii váldit doppe alccesis áhká, ja ahte Isak lei buressivdnidan su ja gieldán su váldimis áhká kanaanlaččaid nieiddain. 7Jakob lei jeagadan áhčis ja eatnis ja vuolgán Paddan Aramii. 8Dalle Esau ipmirdii ahte su áhčči Isak ii liikon kanaanlaš nissoniidda. 9Nu son manai Abrahama bártni Ismaela lusa ja válddii áhkás guoktá lassin áhkkán Ismaela nieidda Mahalata, Nebajota oappá. 10Jakob vulggii Beer Šebas ja manai Harrana guvlui. 11Go beaivi luoitádii, de son bisánii muhtun báikái idjii, válddii das geađggi oaivvevuložin ja veallánii. 12Ihkku Jakob niegadii ráidalasa mii olii eatnamis gitta albmái, ja Ipmila eŋgelat gorgŋo ja njidje dan ráidalasa. 13Ja Hearrá čuoččui su bálddas ja celkkii: “Mun lean Hearrá, áhčát Abrahama Ipmil ja Isaka Ipmil. Dán eatnama man alde don veallát, mun attán dutnje ja du nállái. 14Du nálli šaddá eatnagin dego eatnama sáttočalmmit, ja don viidánat oarjjás ja nuorttas, davás ja lulás, ja du ja du náli bokte buressivdniduvvojit buot eatnama sogat. 15Mun lean duinna ja várjalan du gosa ihkinassii don jođát, ja mun buvttán du ruoktot dán eatnamii. Mun in guođe du, muhto ollašuhtán dan maid lean lohpidan dutnje.” 16Jakob morihii niegustis ja dajai: “Hearrá lea duođaid dán báikkis, inge mun diehtán dan.” 17De son ballái ja dajai: “Dát lea hirpmus báiki! Dás lea vissásit Ipmila viessu ja almmi poarta.” 18Árrat iđedis Jakob válddii geađggi mii sus lei leamaš oaivvevuložin, ceggii dan bázzin ja golggahii oljju dan ala. 19Son gohčui dan báikki Betelin; ovdal dan gávpoga namma lei leamaš Lus. 20Jakob dagai lohpádusa ja dajai: “Jos Ipmil lea muinna ja várjala mu dán mátkkis, ja jos son addá munnje láibbi borrat ja biktasiid gárvun 21nu ahte mun beasan ráfis máhccat áhččán vissui, de Hearrá lea mu Ipmil. 22Dán báikái masa mun ceggejin geađggi, šaddá Ipmila bassibáikin. Buot das maid don attát munnje, mun attán dutnje logádasaid.”

Les i nettbibelen

1Jakob manai ain ovddos ja bođii nuortaálbmogiid eatnamii. 2Doppe son oinnii meahcis gáivvo ja golbma sávzaealu livvadeamen dan luhtte, dasgo dan gáivvos jugahuvvojedje ealut. Gáivoráiggi ovddas lei stuorra geađgi, 3ja easkka go buot ealut ledje čoahkkanan dasa, de geađgi fierahuvvui eret ja sávzzat jugahuvvojedje. Dasto geađgi biddjojuvvui fas sadjásis. 4Jakob jearai guođoheddjiin: “Vieljažiiddán, guđe báikki olbmot dii lehpet?” Sii vástidedje: “Mii leat Harrana olbmot.” 5Jakob jearai vel: “Dovdabehtetgo dii Labana, Nahora bártni?” Sii vástidedje: “Dovdat mii gal.” 6Son jearai: “Eallágo son dearvan?” Sii vástidedje: “Dearvan son gal eallá, ja do boahtáge su nieida Rakel sávzzaidisguin.” 7Jakob dajai: “Dálhan lea guovdelaš beaivi iige leat vel ealuid čohkkenáigi. Jugahehket sávzzaid ja dolvot daid fas guohtut.” 8Muhto sii dadje: “Eat mii sáhte dahkat dan ovdal go buot ealut leat čoahkis ja geađgi fierahuvvo gáivoráiggi ovddas. Dalle mii jugahit sávzzaid.” 9Go son lei ain sártnodeamen singuin, de Rakel buvttii dasa áhčis sávzzaid, dasgo son dat lávii guođohit daid. 10Go Jakob oinnii Rakela, ednos Labana nieidda, ja su sávzzaid, de son lávkii ovdan, fierahii geađggi gáivoráiggi ovddas ja jugahii ednos sávzzaid. 11De Jakob cummistii Rakela ja čirrui. 12Son muitalii Rakelii ahte son lea su áhči fuolki ja Rebekka bárdni, ja Rakel viehkalii muitalit dan áhččásis. 13Go Laban gulai ahte su neahpi lei boahtán, de son viehkalii su ovddal, fátmmastii ja cummistii su ja doalvvui su vissosis. Doppe Jakob muitalii Labanii buot mii sutnje lei dáhpáhuvvan, 14ja Laban dajai sutnje: “Don leat duođaid mu oažži ja varra.”

Les i nettbibelen