Bures!
Vállje linnjás muitalusa, ja de bláđe vulos lohkat ja gullat dan.
Giellaválljemis badjin, olgeš bealde, sáhtát válljet giela.
Ipmila lohpádus
Ipmil celkkii Abramii: «Vuolgge!
Mana dan eatnamii maid mun čájehan dutnje!
Mun dagan du stuora álbmogin.
Du siste buressivdniduvvojit buot eatnama sogat.»
Dat lei ártet, go Abramis eai lean mánát.
Su eamit Sárái ii sáhttán oažžut máná.
Son moraštii go ii sáhttán fievrredit soga viidáseappot.
Muhto Abram dagai nu movt Ipmil lei su gohččon.
Go bohte Kanaanii,
de Abram jođii olbmuidisguin eatnama čađa
dassážii go gávnnai bassi báikki.
Doppe son ceggii áltára Ipmilii
ja giittii go ledje ollen dearvan dohko.
Muhto de jearai Sárái: «Movt dat galgá dáhpáhuvvat?
Movt galget buot eatnama sogat buressivdniduvvot du bokte?
Munnos eai leat maŋisboahttit, moai ledne mánáhis olbmot.
Ii munnuide alcceseame ge šatta sohka!»
Abram ii sáhttán dasa vástidit maidege, ja son jearai Ipmilis:
«Maid dáhtut don addit munnje? Mun jámán mánáheapmin,
ja de árbe muhtin mu bálvaleddjiin mus buot».
De dáhtui Ipmil su mannat sáttomeahccái.
Almmis giđđudedje dievva násttit ihkku.
«Geahčes bajás!» dajai Ipmil. «Loga násttiid, jus sáhtát!»
Abram geahččalii, muhto fertii vuollánit,
almmis ledje menddo olu násttit.
«Nie eatnagin šaddá du sohka»,
lohpidii Ipmil, ja Abram oskkui Ipmilii.
Abram lea dat seamma namma go Abraham. Geahča 1.Mos 17,5. Sarai
oaččui maŋŋel nama Sárá. Geahča 1.Mos 7,15.
Loga muitalusa Biibbalis
1Hearrá celkkii Abramii: “Vuolgge eatnamisttát, sogat luhtte ja áhčát viesus dan eatnamii maid mun čájehan dutnje. 2Mun dagan du stuorra álbmogin, mun buressivdnidan du ja dagan du nama stuorisin, ja dat šaddá buressivdnádussan. 3Mun buressivdnidan daid geat buressivdnidit du ja garuhan daid geat garuhit du, ja du siste buressivdniduvvojit buot eatnama sogat.” 4Abram vulggii, nugo Hearrá lei gohččon, ja Lot vulggii ovttas suinna. Abram lei čiežalogiviđajahkásaš go son vulggii Harranis. 5Abram válddii mielde áhkás Saraja ja vieljas bártni Lota ja buot opmodaga, maiddái buot šlávaid maid sii ledje háhkan Harranis. Dasto sii johttájedje Kanaanii.Go sii bohte Kanaanii, 6de Abram vádjolii Kanaana eatnama čađa Sikema bassi báikki rádjái, More terebintta rádjái. Dan áigge kanaanlaččat ásse dan eatnamis. 7Hearrá almmustuvai Abramii ja celkkii: “Du nállái mun attán dán eatnama.” Ja Abram ráhkadii dasa áltára Hearrái, guhte lei almmustuvvan sutnje. 8Doppe son manai Betela nuorttabeali várreeatnamii ja ceggii goađi nu ahte Betel lei oarjjabealde ja Ai nuorttabealde. Son ráhkadii dohko áltára ja čuorvvui Hearrá nama. 9Abram jođii maŋistaga guhkibuidda Negeva guvlui.
1Dáid dáhpáhusaid maŋŋil Abramii bođii oainnáhusas dát Hearrá sátni: “Ale bala, Abram! Mun lean du galba, ja du bálká šaddá sakka stuorisin.” 2Abram dajai: “Hearrá, mu Ipmil, maid don attášit munnje? Munhan jámán mánáheapmin, ja damaskuslaš Elieser árbe mu.” 3Abram dajai vel: “Munnje don it leat addán máná,, ja danne mu bálvaleaddji árbe mu.” 4Muhto sutnje bođii dát Hearrá sátni: “Ii son árbe du, muhto du árbe du iežat bárdni.” 5Ja Hearrá doalvvui su olggos ja celkkii: “Geahča albmái ja loga násttiid, jos máhtežat daid lohkat. Ná eatnagin šaddá du nálli.” 6Abram oskkui Hearrá lohpádussii, ja Hearrá anii su vanhurskkisin.