Bures!
Vállje linnjás muitalusa, ja de bláđe vulos lohkat ja gullat dan.
Giellaválljemis badjin, olgeš bealde, sáhtát válljet giela.
Jesus 12 jahkásaš
Josef guovttus Mariain láviiga juohke jagi mannat Jerusalemii
beassášbasiid ávvudit.
Soai illudeigga.
Jerusalemii ádjánii logi beaivvi johtit
ja olu olbmot ledje dalle dohko manus.
Dán jagi lei sudno bárdni mielde, nu movt dábálaččat láviige.
Buohkat moddjájedje ja ledje ilus gávpoga guvlui manadettiin.
Jerusalemis oruiga Josef ja Maria fulkkiid luhtte.
Sii borre juohke beaivvi buriid biepmuid, lávlo ja ságastalle,
váccašedje baskkes gáhtaid mielde gos lei olmmošeatnavuohta
ja finadedje dan stuora tempelis.
Sin biktasiin haksui suovvas miehtá vahku.
Go basit nohke, de sii jorggihedje fas ruovttoluotta.
Ja sii ledje oallugat.
Mánát vihke ovddamusas,
ja buohkat juogadedje biepmuid gaskaneaset,
humadedje ja bogostaladedje.
Golai olles beaivi ovdal go Josef ja Maria fuobmáiga:
Son ii lean sin fárus. Jesus lei láhppon.
Soai doamaiga fas ruovttoluotta Jerusalemii.
Soai ozaiga su juohke sajes, fulkkiid ja oahppásiid luhtte,
gávpeolbmáid luhtte ja rámbuvrrain ja muvrra olggobealde.
«Lea go oktage oaidnán ovtta guoktenuppelotjahkásaš bártnáža?»
Goalmmát beaivvi manaiga soai heđiineaskka ohcat su tempelis.
Doppe soai gávnnaiga su, čohkkáme oahpaheddjiid gaskkas.
Son čohkkái ja guldalii sin ja gažadii sis.
«Erenoamáš jierbmás bártnáš», dadje vuorrasat.
Muhto eadni dajai: «Bártnažan, manin don dahket ná munno vuostá?
Du áhčči ja mun ledne leamaš nu balus!»
Bártnáš geahčai ipmašit sudnuide ja vástidii:
«Eahppigo doai diehtán ahte mun ferten leat Áhččán viesus?»
Maria ja Josef eaba ipmirdan maid son oaivvildii.
Gohčodii go son tempela iežas Áhči viessun?
Maria dajai ahte son fertii vuolgit sudno mielde ruoktut, ovttatmano.
Muhto son vurkii váibmosis daid sániid maid son lei dadjan,
ja maŋŋil son jurddašii dávjá daid birra.
Jesus celkkii oahpaheddjiide “Báhcet dearvan”,
guđii tempela ja Jerusalema
ja čuovui jegolaččat mielde ruoktut eatnis vissui.
Loga muitalusa Biibbalis
41Juohke jagi Jesusa vánhenguovttos láviiga mannat Jerusalemii beassášbasiide. 42Go Jesus lei guoktenuppelotjahkásaš, de sii vieru mielde manne fas dohko doallat basiid. 43Go bassebeaivvit ledje vássán ja olbmot vulge fas ruoktot, de bártnáš bázii Jerusalemii, eabage su áhčči ja eadni dan diehtán. 44Soai gáttiiga ahte bártnáš lei mátkeguimmiid fárus ja jođiiga olles beaivása, ovdal go ohcagođiiga su fulkkiid ja oahppásiid gaskkas. 45Go soai eaba gávdnan su, de soai máhcaiga Jerusalemii ohcat su doppe. 46Golmma beaivvi geažes soai gávnnaiga su tempelis. Son lei čohkkámin oahpaheddjiid gaskkas, guldalii sin ja gažadii sis. 47Buohkat geat gulle maid son sártnui, ovddošedje su ipmárdusa ja su vástádusaid. 48Go su vánhenguovttos oinniiga su, de soai hirpmástuvaiga sakka, ja su eadni dajai: “Bártnážan, manin don dahket munnuide ná? Moai du áhčiin letne ohcan du, ja moai leimme balus.” 49Jesus vástidii: “Manne doai ozaide mu? Eahppigo doai diehtán ahte mun ferten leat mu Áhči viesus?” 50Muhto soai eaba ipmirdan maid son dainna oaivvildii. 51De Jesus vulggii sudnuin Nasaretii ja lei sudnuide jegolaš. Su eadni vurkii váibmosis buot mii lei dáhpáhuvvan.