Bures!
Vállje linnjás muitalusa, ja de bláđe vulos lohkat ja gullat dan.
Giellaválljemis badjin, olgeš bealde, sáhtát válljet giela.
Máhttájeaddjit
Peter lei leamaš oaggume ija miehtá.
Galbmon, njuoska gieđat dolle áirruid.
Guollebivdit suhke gáddái, beaivi lei juo badjáneame.
«Ii oktage guolli dan ijá» šuohkehii Peter alccesis.
Jávregáddái ledje olu olbmot čoagganan
gullat maid Jesus muitalii.
«Lehpet go goddán guliid?» čurvii Jesus Peterii.
«Suhket fávlelii ja suhppot dohko firpmiid.»
Peter vástidii: «Mii leat bargan geažos ija
eatge leat ožžon ovttage unná guolážage.
Muhto go don gohčut, de sáhttit mii geahččalit fas suohpput.»
Sii dahke nu movt son lei gohččon.
Sii suhke fas fávlái,
suhppejedje firpmiideaset ja vurde.
De dáhpáhuvai juoga.
Mearra šuđđagođii ja duoldagođii,
dievva guliiguin!
Firpmiide dárvánii nu ollu guolli
ahte dat goasii gaikodedje!
«Bohtet veahkkin! čurvejedje sii olbmáide dan nuppi fatnasis.
Sii devde guliid goappešat fatnasiidda
nu olu guliid ahte sii goasii devdojedje.
Go ollejedje sállašiin gáddái, luoitádii Peter Jesusa julggiid ovdii.
Muođut hillaštedje. Son lei sakka heahpanan.
«Hearrá, guođe mu! Don leat Ipmilis boahtán,
ja mun lean dušše olmmoš. Mun eahpidin du!»
«Čuovo mu!» dajai Jesus ja moddjái sutnje.
«Dás maŋos galggat don bivdit olbmuid.»
Loga muitalusa Biibbalis
1Go Jesus muhtun beaivvi lei čuožžumin Gennesaretjávrri gáttis ja olbmot bahkkejedje sutnje vai besset gullat Ipmila sáni, 2de son oinnii jávregáttis guokte fatnasa. Bivdit ledje mannan dain eret ja ledje doidimin firpmiideaset. 3Jesus manai nuppi fatnasii, mii gulai Simonii, ja dáhtui su sirdit veaháš gáttis eret. De son čohkánii ja oahpahii olbmuid fatnasis. 4Go Jesus lei geargan sárdnumis, de son celkkii Simonii: “Suhket fávlái ja suhppot firpmiid.” 5Simon vástidii: “Oahpaheaddji, mii leat bargan geažos ija eatge leat ožžon maidege. Muhto mun suhppen vel fierpmi, go don gohčut.” 6Sii dahke nu ja fidnejedje nu stuorra guollehivvodaga ahte sin fierbmi gaikánišgođii. 7Sii sevve guimmiideaset geat ledje nuppi fatnasis, boahtit veahkkin. Sii bohte ja devde goappašiid fatnasiid nu ahte dat goasii vudjo. 8Go Simon Peter dan oinnii, de son luoitádii Jesusa julggiid ovdii ja dajai: “Hearrá, mana eret mu luhtte! Mun lean suttolaš olmmái.” 9Stuorra sálaš lei hirpmástuhttán su ja buohkaid geat ledje suinna, 10nu maiddái Sebedeusa bártni guoktá Jakoba ja Johannesa geat leigga Simona bivdoguoimmit. Muhto Jesus celkkii Simonii: “Ale bala. Dás maŋás don bivddát olbmuid.” 11De sii suhke gáddái, guđđe buot ja čuvvo Jesusa.