Bures!
Vállje linnjás muitalusa, ja de bláđe vulos lohkat ja gullat dan.
Giellaválljemis badjin, olgeš bealde, sáhtát válljet giela.
Jeđđehussánit
Israel juhkkojuvvui guovtti riikan.
Davviriikii márre dievva olbmot ja dat duššaduvvui.
Lulliriika oktan Jerusalemiin birgii guhkit,
muhto sis ledje vašálaččat birra buot.
De Babylona prinsa válddii Jerusalema.
Muhto dán háve son ii billistan gávpoga
ja iige son dolvon olbmuid láhkkiin čatnagasas Babylonii.
Son dagai dušše dán:
Son rivvii mielde čáppa ja čeahpes bártniid,
olbmuid geat heivejedje Babylona hovvii.
Eatnit čirro go sin bártnit dolvojuvvojedje,
muhto earát báhce dasa jaska čuožžut,
ja dovde geahpádusa go ii lean sin vuorru – dán háve.
Bártniid gaskkas ledje maiddái Daniel ja su olbmát.
«Mii eat ábut vajálduhttit geat mii leat.
Mii eat galgga goassege vajálduhttit Jerusalema» sapme sii.
Amas riikkas meannudedje olbmot singuin bures.
Sii ožžo oahpu buot Babylona viissisvuođas,
ja besse borrat gonagasa beavddis.
Almmake sii eai vajálduhtán báhkkomiid
maid ruovttus ledje oahppan,
sii dolle rohkosbottuid ja doalahedje iežaset eret buhtismeahttun biepmuin.
Nu sii movttiidahtte guhtet guimmiideaset.
Muhtin beaivvi bođii reive.
Dat lei Jerusalema profehtas.
Son čálii sidjiide geat ledje dolvojuvvon eret:
«Mun dieđán makkár jurdagat mus leat din hárrái,
cealká Hearrá; ráfi jurdagat ja eaige oasehisvuođa jurdagat.
Mun attán didjiide boahtteáiggi ja doaivvu.
Go čiezalogi jagi leat gollan,
de mun buvttán din fas ruoktot.»
Sii gehčče guhtet guoibmáseaset ja dadje nannosit:
«Mii eat vajálduhte Jerusalema goassege!»
Loga muitalusa Biibbalis
10Ná cealká Hearrá: Go Babylona čiežalogi jagi leat dievvan, de mun fas geahčan din beallái. Mun ollašuhtán iežan buori sáni ja buvttán din ruoktot din iežadet eatnamii. 11Mun dieđán makkár jurdagat mus leat din hárrái, cealká Hearrá, dat leat ráfi jurdagat eaige oasehisvuođa jurdagat: Mun attán didjiide boahtteáiggi ja doaivvu.
1Juda gonagasa Jojakima goalmmát ráđđenjagi fallehii Babylonia gonagas Nebukadnesar Jerusalema ja birastahtii gávpoga. 2Hearrá attii Jojakima, Juda gonagasa, su gihtii, ja maiddái muhtun bassi lihtiid Ipmila viesus. Nebukadnesar doalvvui lihtiid Sineara eatnamii ja bijai daid iežas ipmila dávvirgámmárii. 3De gonagas gohčui bajimus hoavvaolbmás Ašpenasa válljet muhtun israellaččaid gonagaslaš sogas ja allanálat bearrašiin, 4čáppa nuorra olbmáid geain ii lean mihkkege liittuid ja geat ledje viisát, čeahpit ja oahppilat, nu ahte sii livčče dohkálaččat bálvalit gonagasa šloahtas, ja gohčui oahpahit sidjiide kaldealaččaid girjjálašvuođa ja giela. 5Gonagas mearridii ahte sii juohke beaivvi galge oažžut borramuša ja viinni su iežas beavddis. Sii galge oahpahuvvot golbma jagi ja das maŋŋil bálvalit gonagasa. 6Sin searvvis ledje Daniel, Hananja, Mišael ja Asarja, buohkat Juda čearddas. 7Bajimus hoavvaolmmái bijai sidjiide ođđa namaid: Danielii son bijai namman Beltešassar, Hananjai Šadrak, Mišaelii Mešak ja Asarjai Abed-Nego. 8Muhto Daniel mearridii ahte son ii daga iežas buhtismeahttumin gonagasa beavddi borramušain ja viinniin, ja son ánui bajimus hoavvaolbmás beassat vealtat dakkáris mii lea buhtismeahttun. 9Ipmil lei dahkan bajimus hoavvaolbmá láđisin ja buorredáhtolažžan Danielii, 10muhto bajimus hoavvaolmmái dajai Danielii: “Mun balan ahte mu hearrá ja gonagas gii lea mearridan maid dii galgabehtet borrat ja juhkat, ii ane din seammá dearvvašin go daid eará nuorra olbmáid, ja dalle dii dagahehpet munnje heakkaheađi.” 11Dalle Daniel dajai bearráigeahččái gean bajimus hoavvaolmmái lei gohččon atnit fuola sus alddis, Hananjas, Mišaelis ja Asarjas: 12“Geahččal bálvaleddjiidat logi beaivvi ja atte midjiide dušše šattuid borrat ja čázi juhkat. 13Buohtastahte min dasto daiguin nuorra olbmáiguin geat leat borran gonagasa beavddi borramuša, ja daga midjiide dalle nugo anát buoremussan.” 14Bearráigeahčči mieđihii sin átnumuššii ja geahččalii sin logi beaivvi. 15Go dat logi beaivvi ledje vássán, de sii ledje čábbábut ja deahkkábut oaidnit go dat nuorra olbmát geat ledje ožžon borramuša gonagasa beavddis. 16Dalle bearráigeahčči divttii sin vealtat gonagasa borramušain ja viinnis ja attii sidjiide šattuid borrat. 17Ipmil attii dan njealji nuorra olbmái jierpmi ja áddejumi ipmirdit buotlágán čállagiid ja viisodaga, ja Daniel máhtii čilget buot oainnáhusaid ja nieguid. 18Go dat áigi lei boahtán maid gonagas lei mearridan, de bajimus hoavvaolmmái doalvvui sin Nebukadnesara ovdii. 19Gonagas sártnui singuin, ja son gávnnahii ahte ii oktage nuorra olbmáin lean Daniela, Hananja, Mišaela ja Asarja veardásaš. Nu sii besse bálvalit gonagasa. 20Álo go gonagas jearai sis muhtun ášši mii gáibidii viisodaga ja ipmárdusa, de son gávnnahii ahte sii ledje logi geardde viisábut go buot iežas riikka einnosteaddjit ja mánideaddjit. 21Daniel lei hoavas gonagas Kyrosa vuosttaš ráđđenjagi rádjái.