Bures!
Vállje linnjás muitalusa, ja de bláđe vulos lohkat ja gullat dan.
Giellaválljemis badjin, olgeš bealde, sáhtát válljet giela.
Sakkeus
Jeriko gávpotpoarta lei rabas.
Jesus ja máhttájeaddjit manne sisa.
Stuora olmmošálbmot čoagganii gealdagasat sin birra.
Sii ledje gullan buot daid jáhkemeahttun daguid mat dáhpáhuvve Jesusa birra.
Gávpogis lei maid okta olmmoš gii lei hui gealdagasas.
Su namma lei Sakkeus,
ja son lei duolláriid oaivámuš ja hui rikkis.
Gávpotpoarttas gáibidedje romalaččat duollu gálvvuin,
ja Sakkeus barggai sin ovddas.
Su riikka olbmot atne su behtolaš olmmožin.
Sakkeus geahččalii gársat olbmmošálbmoga čađa.
Son háliidii oaidnit Jesusa.
Muhto son lei unni šattus, ja ii beassan lahkage.
De son viegai ovdalii ja gávnnai muora
man meattá Jesus fertii mannat.
Sakkeus goarkŋastii nu jođánit ja áŋgirit murrii
ahte su silkereadju
gaikodii.
Son vurddii doppe gealdagasas ja guovllai ovssiid ja lasttaid gaskka,
ja viimmat: Die oidnui Jesus boahtime ja olles olmmošveahka su mielde.
Muhto go Jesus ollii muora rádjái, de son bisánii,
geahčai bajás, njuolga Sakkeusii, ja dajai:
«Sakkeus, doama njiedjat vulos!
Odne mun boađán du dállui.»
Sakkeus njiedjalii hoahpus vulos.
Ja fáhkkestaga lei son Jeriko ilolaččamus olmmoš.
Son oahpistii Jesusa iežas vissui
ja iige beroštan gullatge go olbmot unohaste dan.
Iige son bálljo gullange go olbmot nimmoredje ja dadje:
«Iigo Jesus dieđe ahte son manná behtolaš olbmovissui guossin?»
Son dajai baicce iluin:
«Hearrá, beali iežan opmodagas
attán mun gefiide,
ja geas lean geassán liiggás,
de sii galget oažžut njealjegeardásaččat ruovttoluotta!»
De celkkii Jesus buohkaid gulu:
«Odne lea bestojupmi boahtán dán vissui.
Mun lean boahtán máilbmái
ohcat sin geat leat láhppon
ja beastit sin.»
Loga muitalusa Biibbalis
1Jesus bođii Jerikoi ja vádjolii gávpoga čađa. 2Doppe lei olmmái gean namma lei Sakkeus. Son lei tuolláriid oaivámuš ja hui rikkis. 3Son dáhtui oaidnit mii olbmáid Jesus lei, muhto go lei uhcci šattus, de son ii oaidnán su olbmuid duohken. 4Nu son viegai ovdalii ja gavccui meahccefiikonmurrii, vai beassá oaidnit Jesusa gii lei boahtimin dan geainnu. 5Go Jesus bođii dan sadjái, de son geahčastii bajás ja celkkii: “Sakkeus, njieja hoahpus. Odne mun boađán du dállui.” 6Sakkeus njiejai hoahpus ja válddii Jesusa guossái iluin. 7Go olbmot oidne dan, de sii buohkat nimmoredje ja dadje: “Suttolaš olbmá lusa son manai orrut.” 8Muhto Sakkeus dajai Hearrái buohkaid gullut: “Hearrá, beali opmodagastan mun attán gefiide, ja geas lean gaikon liiggás, dasa mun attán ruoktot njealjegeardásaččat.” 9Jesus celkkii sutnje: “Odne lea bestojupmi boahtán dán vissui, dasgo sonnai lea Abrahama bárdni. 10Aiddo dan mii lei láhppon, Olbmobárdni lea boahtán ohcat ja beastit.”